CEBU, Philippines - Harungon sa no. 2 seed San Marino Corned Tuna-USC Warriors ang no. 7 seed Bibbo-CIT Wildcats inig sugod sa quarterfinals sa 4th CESAFI Partner's Cup karong Marso 6 diha sa Cebu Coliseum.
Pormal nga gitapos sa Warriors ang elimination round isip second placer human sa ilang 69-62 nga kadaugan batok sa Prime Asia-DBTC Greywolves sa usa ka non-bearing game niadtong miaging gabii, samtang ang Wildcats natagak ngadto sa no. 7 human mapilde ngadto sa no. 5 Aerosol-USPF Panthers .
Ang Warriors uban sa no. 3 PTT Fuels-UV Lancers ug no. 4 Enervon C-UC Webmasters parehong naghupot og twice-to-beat advantage batok sa ilang tagsa-tagsa ka karibal atol sa quarterfinals.
Sa 5-1 tie uban ang Ave Maria Sanctuary Park-Jaguars, ang Warriors napakyas pagkab-ot sa kinatas-ang dapit pinaagi sa simple tie dihang napilde ngadto sa USJ-R sa opening day niadtong miaging bulan.
Sa secondary division, ang 6-0 nga UC Junior Webmasters, ang bugtong team nga miharos sa elimination round, mopahuway sab atol sa quarterfinals.
Ang no. 2 seed CIT Wildkittens maoy makigtakus batok sa no. 7 DBTC Junior Greywolves sa quarterfinals, ang no. 3 UV Baby Lancers makigsangka batok sa no. 6 USPF Baby Panthers, samtang ang no. 4 USJ-R Baby Jaguars makigbugno sa no. 5 USC Baby Warriors. (BANATNEWS)