Jonel's Trucking hari sa 2010 BLBA caging

CEBU, Philippines - Gipukan sa Jonel's Trucking ni team owner Joel Cal ang Bing & Art nilang Bing Abbu ug Art Arellano, 84-75 aron langkaton ang korona sa 2010 Barangay Labangon Basketball Association (BLBA) diha sa Labangon Sports Complex.

Human magtabla sa first period, 20-all, sila si Petoy Mata, Rowel Sumalinog ug ex-USPF Panther Erik Espinosa nagkumboya og 29-12 nga rally sa sunod nga kuwarter aron pagposte og 17 puntos nga bentaha sa iskor nga 49-32.

Hinay-hinay hinuon nga mibangon gikan sa pagkasukarap ang Bing & Art ug subling nakasikit sa iskor, 70-72 sa katapusang 2:45 sa fourth period pinaagi sa nagpungasi nga puntos nilang Mokong Abella, Baldo Caburnay ug Arellano.

Ang duha ka mahinungdanong free throws ni Mark Elizondo maoy nag-inat sa labaw ngadto sa kuwatro puntos, 74-70 sa nahabiling 35 segundos ug wala na kini motugot nga makagukod pa ang Bing & Art.

 Sila si Sumalinog ug Mata parehong mihipos og 19 puntos aron pangulohan ang Jonel’s Trucking, samtang si Espinosa midugang og 11 puntos.

Ang pilderong Bing & Art gipangulohan sab ni Abella pinaagi sa iyang 33 puntos.

Si Labangon Brgy. Capt. Felix Abella ug barangay councilor Ronald Dagatan, kinsa mao sab ang chairman sa BLBA, maoy mitunol sa mga tropeyo ug medalya ngadto sa mga mananaog ug individual achievers.

Si Espinosa maoy napiling MVP ug maoy nangulo sa Mythical Five uban nilang Ramil Hapin, Michael Arias, Jeffrey Diola ug Abella.

Mga special awards gihatag sab ngadto nila ni Boboy Omana (three-point king), Elizondo (sportsmanship), Bay Villarta (best defensive player) ug Cesar Esteban Ortega (best coach).

PUNTOS MATAG USA

Jonel’s (84) - Sumalinog 18, Mata 18, Espinosa 11, Lansang 10, Villarta 7, Navaja 6, Elizondo 4, Quiroz 4, Cal 4, Cabilla 2

Bing & Art (75) - Abella 33, Caburnay 15, Arellano 10, J. Ricarte 5, Java 4, Craso 4, A. Ricarte 2, Paez 2   (BANATNEWS)