CEBU, Philippines - Gipanglubong sa Ave Maria Sanctuary Park-USJR Baby Jaguars ug San Marino Corned Tuna-USC Baby Warriors ang tagsa-tagsa nila ka kaatbang sa secondary games sa penultimate round sa 4th CESAFI Partner’s Cup kagahapon diha sa Cebu Coliseum.
Ang Baby Jaguars midemolis sa Aerosol-USPF Baby Panthers sa iskor nga 96-62, samtang ang Baby Warriors mi-ihaw usab sa Prime Asia-DBTC Junior Greywolves, 82-67.
Sikit ang duwa sa first period, apan ang Baby Jaguars nagsugod og panginit sa sunod nga kuwarter ngadto na sa third period diin ilang gikuninitan ang Baby Panthers aron pagposte og 42 puntos nga labaw sa iskor nga 78-36.
Si Vernon Legaspi mao ang topscorer alang sa Baby Panthers pinaagi sa iyang 14 puntos, gisundan nila ni June Arthur Go ug Clyde Heber Alob mitampo og 12 puntos matag usa.
Bugtong miwadwad og maayo sa pilderong Baby Panthers mao si Rommel Diapera, kinsa mipabuto og 28 puntos.
Ang daog maoy mihatag sa Baby Jaguars og 3-2 win-loss record, samtang ang Baby Panthers nakahiagom sa ikatulo nilang kaparotan uban ang usa ka daog.
Sa ilang bahin, tulo ka players sa Baby Warriors ang mirehistro og double figures alang sa ilang 3-3 win-loss record, samtang ang Junior Greywolves mobiya sa torneyo nga walay bisan usa ka daog sulod sa unom nila ka duwa. (BANATNEWS)