UV Lancers vs. UC Webmasters

CEBU, Philippines - Kun dili gihapon moduwa karon si Greg Slaughter sa PPT Fuels-UV Lancers, hayan walay maka-depensa'g maayo ni 6-foot-9 center June Mar Fajardo ug dili siya kapugngan alang sa Enervon C-UC Webmasters atol sa ilang krusyal nga duwa sa 4th CESAFI Partner’s Cup diha sa Cebu Coliseum.

Samtang sugdan karon sa Ave Maria Sanctuary Park-USJR Jaguars ang una sa duha ka lakang aron mo-sweep sa elimination sa dihang ilang sangkaon ang Bibbo-CIT Wildcats sa laing collegiate match.

Ang UV Lancers ug UC Webmasters parehong nangandoy og daog uban ang paglaum nga makabaton og twice-to-beat advantage sa sunod hugna sa torneyo.

Ang top team makaangkon og lingkoranan sa semifinal, samtang ang second ug third seed makapahimos og twice-to-beat incentive batok sa No. 4 ug No. 5. Ang Lancers ug Webmasters kasamtangan karong nagtabla sa managsamang 2-2 win-loss records.

Walay duda, si Fajardo maoy masentro sa duwa karong gabii batok sa Lancers ug tataw nga siya maoy bread and butter sa opensiba sa Webmasters. Kinahanglan sab siya og suporta nilang Moncrief Rogado, Kelvin Juliane, Edward Pao, Kevin Quilantang ug Rommel Luceno. Samtang ang Lancers magsalig sa dakung kasinatian nilang Phil Mercader, Edrian Lao, Mark Anthony Manigque, Harold Cincoflores ug Jerome Silva.

Sa laing bahin, ang Jaguars nga adunay upat ka daog, magsalig nilang Armand Ponce, Jabe Delfino ug Manny Gabas, kinsa makigkumboya nilang Edwin Bibera, Kurt Amores ug Marvin Duran.

Ilang harungon ang Wildcats nga gibitoonan nilang Jerry Jaca, Gerry Cavan ug kamikaze Sherwin Abobo. – BANAT NEWS