CEBU, Philippines - Ang garbo sa Sugbu nga si Mendel Lopez subling mopakita sa iyang abilidad sa laing edisyon sa Standard Chartered Hong Kong Marathon karong Domingo didto sa Hong Kong.
Batok sa liboan ka mga tang-ang runners gikan sa nagkadaiyang bahin sa kalibutan, si Lopez mihatag og dungog sa nasud human kini mipahiluna sa ikaupat nga dapit sa miaging tuig nga Hong Kong Marathon. Si Lopez, sakop sa Philippine Team tinguhang mopalambo pa sa iyang performance ug mosuway pagsakmit sa titulo.
Gisuportahan ni Sportswriters Association of Cebu (SAC) president John Pages, Leona’s Bakeshop ug Holiday Gym and Spa, si Lopez mipasalig nga buhaton niya ang tanan bisan pa sa kalisud sa iyang tahas nga pagasubangon.
Gawas ni Lopez, modagan usab sa labing una niyang international marathon si kanhi swimmer Lhoriz Echavez ubos sa 21K half-marathon. – BANAT NEWS