Mandaue boxers mihakot og medals
CEBU, Philippines - Mipakita og maayong away ang mga Mandaue City boxers sa ilang kampanya sa 2010 Mayor Tinga Cup Invitational Amateur Boxing Tournament didto sa Cantada Sports Complex sa Taguig.
Ang Team Mandaue ni coach Peter Cuizon mihakot og usa ka bulawan, duha ka silvers ug usa ka bronze.
Si Mark Bernaldez maoy mihatag og bulawan alang sa Mandaue human siya manghawod sa 57 kgs. category sa 15 to 17 age-bracket.
Mao kini ang ikaduhang bulawan nga iyang nahipos karong tuiga human usab siya mipakita og maayong performance sa National Youth Championships didto sa Puerto Princesa.
Nahanaw ang kahigayonan ni Basilio Sultan nga mosakmit sa ikaduha niyang bulawan human mapilde ngadto ni Mesaeck Alfuerto pinaagi sa puntos, 15-9 sa 51 kgs. class.
Nahimo nga kontrobersiyal ang kapildihan ni Michael Romarate human mi-protesta si Cuizon tungod sa paghatag sa hurado sa daog ngadto ni Ruiz Laurence Tesorio.
Matud ni Cuizon, nga "bias" ang paghatag sa daog ngadto ni Tesorio bisan og klaro kaayo nga naglabaw si Romarate sa puntos.
Sa iyang bahin, ang silver medalist sa miaging tuig nga si Reoxyl Tabogon pakyas pagdaog og medalya alang sa Mandaue, apan mipakita gihapon kini sa iyang nindot nga labok atol sa torneyo. (BANATNEWS)
- Latest
- Trending
