Los Amigos ug Better Run abante sa cgbl semis

CEBU, Philippines - Nakasakmit og luna alang ngadto sa semifinals ang Mandaue City-based nga Los Amigos Basketball Association (LABA) ug ingon man usab ang Better Run Basketball Association (BRBA) human ilang gipalagpot ang tagsa-tagsa nila ka kaatbang sa nagpadayong Cebu Golden Basketball League (CGBL) kaniadotng Sabado sa gabii didto sa Inayawan Sports Complex.

Ang LABA quintet nga gipangulohan sa ilang team leader nga si Banilad, Mandaue barangay captain Glenn Bercede, mipalagpot sa mga batos gikan sa Danao City ang Danao Ruby Star Basketball Association (DARUSBA) pinaagi sa pag-iskor og 84-73 nga kadaogan.

Tungod sa maong kadaogan, ang LABA maoy nakakuha sa ikatulong pwesto sa semifinals ug kinahanglan silang modaog duha ka higayon batok sa no. 2 qualifier Minglanilla Basketball Association (MIBA) kung tuyo nilang moabante sa finals.

Sa laing duwa, ang Better Run midispatsar sab sa Naga Above Forty Basketball Association (NAFBA) human kini nila patapsingi sa iskor, 110-109 aron maangkon ang ika-upat nga luna sa semifinals.

Ang maong kadaogan mitimaan sab sa pagkulit og scoring record ni Pacito Campos kinsa mipabuto og 51 puntos aron pangulohan ang opensa sa Better Run. Ang Better Run nga gitukod ni Danny Duran nga mao sab ang ilang club adviser, mag-atubang og dakong tahas tungod kay ila man ikasangka ang top qualifier ug title-favorite Power Forty Selection ubos ni skipper Atty. Flor Yosores kinsa magsaulog sa iyang ika-55 nga adlaw'ng natawhan ugmang adlawa, Pebrero 23.

Ang modaog sa semifinals maoy magtakos alang sa korona sa CGBL samtang ang mga pildero maoy mag-abot alang sa ikatulong pwesto.

Nagmangtas na sab si Dodoy Rizane kinsa mibugha og 33 puntos aron pangulohan ang LABA samtang si Ansing Companion midugang og 24 puntos.

Tulo ka players sa DARUSBA ang pulos mi-iskor og double figues nga gipangulohan ni Rowen Capoy kinsa miposa og 17 puntos apan ang ilang captain ball ug sinaligan nga si Joel Castañeda napugngan ngadto lang sa nuybe puntos atol gyud sa importante kaayong duwa diin gikinahanglan og maayo ang iyang kontribusyon sa opensa apan pakyas siya aron pagsalbar sa iyang team.

Sa laing bahin, si Celio Repuesto mi-iksor og 31 puntos alang sa NAFBA ug si Normie Panilag midugang og 23 puntos. - Gabby G. Malagar (BANAT NEWS)