Pharex B lusot sa Ani-FCA; Cobra tinuklaw ang AddMix
MANILA, Philippines - Nagsanib ng puwersa sina Vic Manuel, Woody Co, Chico Tirona at JR Tecson upang tulungan ang Pharex B Complex sa malaking 82-62 panalo kontra ANI-FCA sa 2010 PBL PG Flex-Erase Placenta Cup kahapon sa Yñares Sports Arena sa Pasig City.
Umiskor si Manuel, dating kamador ng PSBA Jaguars, ng 17 puntos para pagbidahan ang Fighting Maroons kasunod ang 13 ni Co at tig-11nina Tirona at Tecson.
Nagdagdag naman ang dating Ateneo Blue Eagle na si Ford Arao ng 10 marka.
Mula sa maikling 37-33 lamang sa first half, pinalaki ng Pharex B Complex sa 16 puntos, 60-44, ang kanilang bentahe matapos ang third period upang ganap nang dominahin ang ANI-FCA.
Tumipa si Neil Pascual ng 14 puntos para sa Ani-FCA sa iitaas ng 13 ni ex-pro JR Sena at 10 ni Marc Cagoco.
Sa inisyal na laro, humugot naman si Paul Lee ng 18 sa kanyang game-high 25 produksyon sa fourth quarter para ibigay sa Cobra Energy Drink ang 81-77 tagumpay laban sa AddMix.
Nagtala ang 6-foot-1 na si Lee ng 8-of-14 fieldgoal shooting bukod pa ang hinakot na 8 rebounds, 5 assists at 2 steals sa loob ng 31 minuto sa playing court.
Nagposte naman ang dating Blue Eagle na si Jai Reyes ng 4 marka, 3 rebounds at 2 assists para sa kanyang debut game sa PBL.
Umakto rin si Lee, tirador ng University of the East Red Warriors sa UAAP, bilang playing assistant coach ni Chongson.
Mula sa pagbibida nina Allen Maliksi, Jan Colina, TG Guillermo at Lester Alvarez, kinuha ng Transformers ni Leo Austria ang 64-57 lamang sa huling pitong minuto ng final canto.
Ngunit tumipa si Lee ng tatlong sunod na puntos kasunod ang basket ni Llagas upang ilagay ang Ironmen sa unahan, 65-64, sa 5:37 nito.
Isang three-point shot ni Lee ang naglayo sa Cobra sa 78-73 sa huling 44 segundo.
COBRA 81 - Lee 25, Cabahug 21, Llagas 18, Mangahas 5, Reyes 4, Hayes 3, Barua 2, Camus 2, Fampulme 1, Torres 0, Aguilar 0.
ADDMIX 77 - Maliksi 19, Colina 10, Nuyles 7, Cubo 7, Guillermo 7, Morial 6, Alvarez 5, Ciriacruz 4, Canada 4, Ynion 3, Amparado 3.Quarterscores: 19-16; 34-36; 51-52; 81-77.
PHAREX B COMPLEX 82 - Manuel 17, Co 13, Tirona 11, Tecson 11, Arao 10, Adolfo 7, Reyes M. 4, Sison 4, Reyes E. 3, Braganza 2.
ANI-FCA 62 - Pascual N. 14, Sena 13, Cagoco 10, Luanzon 9, Acosta 6, Matias 5, Sevilla 4, Florez 1.
Quarterscores: 21-22; 37-33; 60-44; 82-62.
- Latest
- Trending
