Cebu batok Laguna sa final

CEBU, Philippines - Ang M. Lhuillier Kwarta Padala-Cebu Niños ug ang Trace-Laguna Stallions maoy magsangka sa finals sa pre-season sa Smart Liga Pilipinas Conference 4 karong alas-7:00 sa gabii.

Ginamit ang balanse nga atake, ang Cebu Niños ni team owner Michel J. Lhuillier ug multi-titled coach Raul 'Yayoy' Alcoseba miharos sa tulo nila ka duwa sa eliminasyon uban ang yanong 88-73 nga kadaugan batok sa GenSan Pacman Warriors.

Sayo kaayong mipahungaw sa ilang kainit ang Cebu Niños ug miposte kini'g 18 puntos nga labaw   sa halftime, 48-30

Ang kanhi point guard sa Southwestern University (SWU) Cobras nga si Eliud Poligrates maoy miduslit sa opensa sa Niños pinaagi sa iyang 12 puntos, lakip na ang tulo ka sunod-sunod nga three-point shots.

Gikutasan og ginukod ang   MP Warriors sa fastbreak plays nga gihimo sa Niños sa pagpangulo nila ni Marlon Basco ug Stephen Padilla nga maoy nakapainat sa labaw ngadto na sa 24 puntos, 84-60, sa nahabiling 3:21 sa final period.

Si Poligrates maoy topscorer sa Niños nga mibahog og 12 puntos, uban nila ni Mark Ababon ug Stephen Padilla nga miposa og 11 ug 10 puntos matag usa.

Ang pilderong MP Warriors gipangulohan ni Jonathan Pareño kinsa mipabuto og 17 puntos.

Puntos Matag Usa

Cebu (88) - Poligrates 12, Ababon 11, Padilla 10, Santos 9, Basco 7, Dacia 7, Cruz 6, Magsumbol 6, Enriquez 5, Saladaga 5, Nailon 4, Mondragon 4, Mepaña 2

GenSan (73) - Pareño 17, Omandam 9, Nicdao 7, Yambao 7, Mendoza 5, Medalla 5, Farochilen 4, Concepcion 4, Daja 4, Coronado 3, Gonzaga 2, Sagad 2, Locsin 2,Callo 2. – BANAT NEWS