P10,000 giandam alang sa Labogon chessfest
CEBU, Philippines - Mokabat ngadto sa P10,000 nga ganting salapi ang gitagana alang sa mga mananaog sa Labogon Open Chess Tournament karong Pebrero 20-21 diha sa barangay hall sa maong barangay sa dakbayan sa Mandaue.
Gipasiugdahan sa Labogon Chess Learning Centre (LCLC), ang duha ka adlaw nga kompetisyon nga mosubay og 7-round Swiss system format gihapnig ngadto sa tulo ka kategoriya -- open, kiddies ug women's.
Ang makampiyon sa open division makadawat og P4,000, ang second placer makaangkon og P2,000 ug ang third placer mobulsa og P1,000. Ang mopahiluna gikan sa ikaupat hangtod sa ikapito nga dapit makadawat og P700, P500, P300 ug P200.
Ang top seven finishers sa kiddies class mobulsa og P1,000, P700, P500, P300, P200, P150 ug P100, samtang ang top five placers sa women's division mobulsa og P500, P300, P250, P200 ug P100.
Aduna kini registration fee nagkantidad og P150 alang sa open, P70 sa kiddies ug P50 sa women's.
Alang sa dugang mga detalye, niadtong buot mosalmot mahimong mokontak ni LCLC treasurer Evangeline Lanticse o di ba ni tournament organizer NM Leonardo Alidani sa 0939-4890160. (BANATNEWS)
- Latest
- Trending
