ACT Cyber Knights mitipi sa SWU Cobras
Ang Asian College of Technology (ACT) Cyber Knights ni coach Tata Merced mipukan sa Southwestern University (SWU) Cobras,81-70 sa exhibition game atol sa pagbukas sa Asian Games (Intramural) didto sa ACT gym.
Si Prospeto Batiancila Jr. wala makaduwa sa Cyber Knights, apan ila gihapon nga nakontrolar ang duwa.
Si Batiancila miuli sa Bantayan island tungod sa kamatayon sa iyang amahan nga si Prospeto Sr.
Si Adelbert Nuñez maoy nangu sa iyang 19 puntos samtang ang high-leaper nga si Elmer Aparice midugang og 13 puntos. Sila si Carl Valencia ug JC Ver Paraguya miamot og 12 puntos matag usa.
Si Cebu City councilor Rodrigo 'Bebot' Abellanosa, kinsa maoy tag-iya sa ACT nagkanayon nga dakung garbo sa ilang tunghaan nga midaog batok sa usa ka lig-on nga team sama sa Cobras nga kanunay'ng contender sa CESAFI ug mao sab ang defending champions sa National Inter-Collegiate.
Wala sab makaduwa sa Cobras ni coach Bong Begontes ang ilang starting guard nga si Aard Diango.
Si Rene Pacquiao mihakot og 16 puntos aron pangulohan ang opensa sa Cobras.
PUNTOS MATAG USA
ACT (81) - Nuñez 19, Aparice 13, Valencia 12, Paraguya 12, Vistal 9, Doy 8, Pontemayor 5, Alicaway 2, Reyes 2
SWU (70) - Pacquiao 16, Litorja 9, Pria 9, Ortuyo 8, Maguate 6, Guillena 6, Armecin 5
- Latest
- Trending
