CEBU, Philippines - Kapin sa usa ka libo ka running enthusiasts ang gilaumang mosalmot sa 2nd Cebu Rotary Run nga gikatakda karong Pebrero 21 diha sa SM Cebu City North parking area.
Mga kategoriya nga tigian sa lumba mao ang 15K, 7K ug 3K Open ug ang 200m Kiddie Dash. Aduna say dogathon division nga salmotan sa mga runners nga modagan uban sa ilang mga iro.
Sa press conference kagahapon diha sa Eugenia Hall sa Cebu Parklane Hotel, si Kenneth Casquejo, chairman sa maong lumba, nagkanayon nga gawas sa kasaulogan sa ilang ikalimang anibersariyo sa Rotary dinhi sa Sugbu, ang lumba magsilbe usab nga fund-raising program alang sa mga naigo sa sakit nga polio.
Sa laing bahin, ang Hari ug Reyna sa marathon dinhi sa Sugbu nga si Kenyan Simon Losiaboi ug Mary Grace delos Santos, kinsa mitambong sa press conference mipadayag usab sa ilang partisipasyon.
Gawas nila ni Losiaboi ug delos Santos, modagan usab si RP Ironman King Noy Jopson, ABS-CBN News Anchor Atty. Haidee Acuña ug ang 74-year old nga si Renning Ylaya.
Ganting salapi ang nagpaabot alang sa mga kampiyon sa 15K ug 7K runs, samtang gift packs ang madawat sa mga mananaog sa 3K, Kiddie Dash ug dogathon.
Ang kampiyon sa 15K run makadawat og P8,000, samtang sa 7K mobulsa og P5,000.
Alang niadtong gustong mosalmot, aduna kini registration fee nga P150. Ang Kiddie Dash nagkantidad og P100. Mahimong magpalista sa Philippine Sports Commission diha sa Cebu City Sports Center.
Ang lumba gipasiugdahan sa Rotary International District 3860 inabagan sa Cebu Parklane International Hotel, Jollibee, SM City Cebu, Metro Grafix, Alcordo Advertising ug Summit Natural Drinking Water. – BANAT NEWS