CEBU, Philippines - Ang Blue team nga gipangulohan ni Rico Abella naka-ipsot batok sa BIR squad ni Yoli Meso, 80-78 aron mo-abante sa finals sa USC-South Campus PTCA basketball tournament didto sa South Campus covered court sa dalan J. Alcantara, ning dakbayan.
Tungod sa maong kadaugan, ang USC-Blue maoy makig-atbang batok sa USC-White alang sa kampiyonato karong Domingo, Pebrero 14 atol sa PTA (Elementary) Family Day.
Ang pilderong BIR maoy makigsangka sa Red team alang sa ikatulong pwesto.
Ang kanhi USJ-R Jaguar point guard nga si Frankie Lastimoso mihaw-as og 28 puntos, lakip na ang lima ka sagunson nga puntos sa nahabiling uno minuto sa duwa aron luwason ang Blue gikan sa baba sa kapildihan. Si Abella mirehistro sab og double figures pinaagi sa iyang 14 puntos.
Si Jessie Lumantas mibugha og 21 ug si Jun Santiago miabuno og 19 puntos alang sa BIR.
Puntos Matag Usa
USC-Blue (80) - Lastimoso 28, Abella 14, Fernandez 11, Nioda 7, Nacua 6, Hipolito 4, Satorre 2, Lara 2, Arquilos 2, Gayoso 2, Blanque 2
BIR (78) - Lumantas 21, Santiago 19, Legarde 17, Alburo 6, Diamos 6, Meso 4, Victor 3, Galvez 2. – BANAT NEWS