Los Amigos gipakuratan sa miba

CEBU, Philippines - Ang ex-Lancer nga si Toto Fuentes mibahug og 19 puntos samtang tulo sa iyang kauban ang miabuno og double figures aron baswaton ang Minglanilla Basketball Association (MIBA) ngadto sa kulba-hinam nga 85-84 nga kadaogan batok sa Mandaue City-based nga Los Amigos Basketball Association (LABA) sa nagpadayong Cebu Golden Basketball League (CGBL) didto sa Inayawan Sports Complex.

Tungod sa maong kadaogan, nahimutang na karon sa ikaduhang pwesto ang MIBA pinaagi sa paghupot og 3-1 nga baraha samtang ang LABA kinsa nasagunsonan og pilde human sa ilang duha ka daog, aduna na’y 2-2 nga baraha.

Ang Power Forty lang gihapon maoy naghupot sa solong liderato sa ilang 4-0 nga baraha.

Sila si Romy Vasquez ug Titing dela Torre parehong mitali og 17 puntos ug si Balbino Cañada miamot og 12 puntos aron palig-onan ang opensa sa MIBA batok sa tulo ka pambato sa LABA nga sila si Doydoy Rizane, Butong Unabia ug ex-Jaguar ug coach Pablo Yu.

Si Rizane maoy nangu sa LABA sa iyang 24 puntos samtang sila si Yu ug Unabia parehong miburak og 14 puntos.

Sa pasiunang duwa, ang Better Run Basketball Association (BRBA) midaog batok sa Danao Ruby Star Basketball Association (DARUSBA), 113-100 aron pag-inat sa ilang baraha ngadto sa 2-3.

Ang DARUSBA midailos ngadto sa 1-3 nga baraha samtang ang Naga Above Forty Basketball Association (NAFBA) maoy nangiwit sa ilang 1-4 nga baraha.

Ang ex-USPF Panther nga si Dodong Espinosa mihakot og 30 puntos aron pangulohan ang Better Run samtang si Pacito Campos mibugha og 29 puntos ug mi-iskor sila si Dodong Lopez ug Jun Ledesma ug double figures sa ilang 19 ug 14 points, matag usa.

Si Rowin Capoy mipakatap og game-high 36 puntos samtang ang skipper nga si Joel Castañeda mibahug sab og 29 puntos.

Puntos matag usa:

First Game:

Better Run (113)— Espinosa 30, Campos 29, Lopez 19, Ledesma 14, Abadejos 8, Arias 4, Ocañada 4, Albaño 3, Mosqueda 2

DARUSBA (100)— Capoy 36, Castañeda 29, Murillo 6, Almacin 6, Batac 6, Cabahug 4, Tapia 3

Second Game:

MIBA (85)— Fuentes 19, Vasquez 17, Dela Torre 17, Cañada 12, Cadiz 9, Cabradilla 5, Medalle 4, Campos 2

LABA (84)— Rizane 24, Yu 14, unabia 14, Patindol 10, Lopez 7, Colina 7, Pangan 6, Gabucan 2. - Gabby G. Malagar (BANAT NEWS)