UC Jrs mitumba sa Baby Jaguars

CEBU, Philippines - Ang crucial steal ug ang tulo ka sunod-sunod nga crucial points ni John Raphael Aranas maoy yawi sa 79-75 nga kadaugan sa Enervon C-UC Junior Webmasters batok sa Ave Maria Sanctuary Park-USJ-R Baby Jaguars aron maangkon ang solong liderato sa secondary division sa CESAFI Partner's Cup kagahapon diha sa Cebu Coliseum.

Nabiyaan og sayes puntos sa katapusang singko minutos, 64-70, ang Junior Webmasters alistong nakarekober pinaagi sa pagpatuman og solidong man-to-man defense nga nakaparatol sa Baby Jaguars.

Ang Junior Webmasters nakatabla sa iskor, 72-all human sa basket ni Alvin Labolabo Jr. sa nahabiling 2:24 sa duwa. Si Aranas nakailog og bola ug gilahos og lusot aron hatagan ang Junior Webmasters og uno punto nga labaw, 76-75 sa katapusang uno minuto sa duwa.

Si Aranas, kinsa mitapos lang og nuybe puntos, mihimo og laing steal gikan ni Gudeve Edu Autentico nga maoy mihatod kaniya ngadto sa free-throw line. Si Aranas mipasud lang og usa sa duha niya ka free throws alang sa 77-75 nga bentaha sa UC, apan ang free throws ni Jeri Marion Pingoy maoy miselyado sa kadaugan.

Si Labolabo maoy nangu sa Junior Webmasters pinaagi sa iyang 18 puntos, samtang si Pingoy miabuno og 11 puntos.

Sa sayo pa, ang San Marino Corned Tuna-USC Baby Warriors nakalingkawas gikan sa makutas nga duwa batok sa Bibbo-CIT Wildkittens alang sa ilang unang daog sud sa tulo ka duwa.

Si Anthony Gai Romaguera maoy topscorer sa Baby Warriors nga mikadlit og 14 puntos.

PUNTOS MATAG USA

Unang duwa:

San Marino-USC (62) - Romaguera 14, Bongo 8, Antigua 6, Kikuchi 6, Jaca 6, Uy 4, Asotigue 4, Dalangpan 3, Guardario 3, Palapar 2, Malana 2, Paajantoy 2, Ortega 2

Bibbo-CIT (61) - Nalos 15, Batiquin 11, Sancez 9, Tallo 8, Limalima 3, Pamaong 2, Tejam 2, Autor 2, Jungoy 2, Bancale 2

Ikaduhang duwa:

Enervon C-UC (79) - Labolabo 18, Pingoy 11, Aranas 9, Saramosing 8, Nazareno 7, Comendador 5, Talisic 4, Padilla 4, Joseph 4, Yburan 3, Ortega 2, Dela Cerna 2, Otida 2, Codilla 1

Ave Maria-USJR (75) - Muñez 11, Autentico 11, Trozo 10, Tan 7, Legaspi 7, Escatron 6, Montecillo 5, R. Senining 5, Alob 4, Senining 3, Cabasan 2, Eborlas 2, Go 2   (BANATNEWS)