Hoopers, Wildcats nagsawo sa liderato

CEBU, Philippines - Ang Hoopers nga gitimonan ni Yoli Meso ug ang Wildcats mipakgang sa ilang tagsa-tagsa ka kaatbang aron saw-an ang liderato sa Philippine Institute of Certified Public Accountants (PICPA) basketball tournament semifinal round diha sa Vicente Sotto Memorial Gym sa barangay Punta Princesa, ning siyudad.

Gipanitan sa Hoopers ang Timberwolves sa iskor nga 88-64, samtang ang Wildcats mitumba sa Warriors sa iskor nga 70-63.

Sila si Lito Ortiz ug Jeremy Makinano maoy migiya sa Hoopers pagposte og 22-13 sa first period ug miburot pa kini   ngadto sa 27 puntos, 72-45 sa wala pa nila angkona ang 24 puntos nga kadaugan.

 Si Ortiz maoy nangu sa Hooper nga miburak og 28 puntos. Sila si Jun Ongayuren ug Junnie Tayupan mao sab ang nangulo sa giihaw nga Timberwolves nga nagkumboya og 34 puntos. 

Sa laing duwa, si Sonny Dequino miposa og 20 puntos aron pangulohan ang Wildcats, samtang si Arjam Bonsucan midugang og 15 puntos.

Si Jude Seares miposte sab og 20 puntos alang sa pilderong Warriors, samtang si Derek Vivares miamot og 13 puntos.

Puntos Matag Usa

Unang duwa:

Hoopers (88) - Ortiz 28, J. Makinano 17, Tocao 17, Meso 14, Makinao 12

Timberwolves (64) - Oyanguren 20, Tanupan 14, Supilanas 12, Huyos 12, Yap 6

Ikaduhang duwa:

Wildcats (70) - Dequino 20, Bonsucan 15, Jumuad 12, Alejandre 12, Bascog 5, Mora 4, Napuli 2

Warriors (63) - Seares 20, Vivares 13, Patatag 10, Lim 6, Ocupe 5, Cadampog 5, Destriza 2, Sendaydiego 2. – BANAT NEWS