Apartelle gilumsan sa San Remigio

CEBU, Philippines - Kanhi UV Lancers Abel Bungcaras ug si Randy de la Pisa maoy nangulo sa San Remigio Beach Club (SRBC) aron malubong ang The Apartelle Suites, 85-69 sa 1st Benjamin Neri Borromeo Memorial basketball tournament diha sa Immanuel Bible Center (IBC) gym sa Banawa, ning siyudad.

Sa laing duwa, ang Tuesday Club mikulit sa labing una nilang daog sud sa pito ka duwa human sab nila gilubong   ang Cebu Grand Hotel, 97-77.

Si Bungcaras, kinsa mao karon ang assistant coach sa UV Baby Lancers, mihakot og 21 puntos, samtang si De la Pisa midugang og 19 puntos alang sa San Remigio nga nag-solo karon sa ikaduha sa standings bitbit ang 4-1 nga baraha sunod sa Apartelle nga maoy nag-una pinaagi sa ilang 6-2 win-loss record.

Si Wilson Gabucan maoy nangulo sa Apartelle sa iyang 18 puntos, gisundan ni Bong Eleazar nga adunay 15 ug Oliver Sanoy sa iyang 14 puntos.

 Sa laing bahin, si Nesty Mendoza miburak og 31 puntos aron pangulohan ang Tuesday Club aron mabugto ang ilang unom ka sunod-sunod nga kapildihan. Si Aaron Pancho miabuno og 19 puntos ug si Ralph Rosales mikandos og 17 puntos.

Si Lorelito Luis Enero mipabuto og game-high 35 puntos, apan nausik lang ang iyang mga paningkamot kay napilde ang iyang koponang Grand Hotel, kinsa nagtangag karon og 3-3 nga baraha. .

PUNTOS MATAG USA

Unang duwa:

TUESDAY CLUB (97) - Mendoza 31, Pancho 19, Rosales 17, Saucillo 12, Jacop 8, Romagos 6, Aquino 2

CGH (77) - Enero 35, Tabolong 11, Morante 8, Sonsona 7, Ortega 7, Malalay 3, Abad 2, Daruca 2, Gonzales 2

Ikaduhang duwa:

SAN REMIGIO (85) - Bungcaras 21, Dela Pisa 19, Ninel 11, Mariano 11, Ferrolino 10, Bruzon 6, Marano 2, Alano 2

APARTELLE (69) - Gabucan 18, Eleazar 15, Sanoy 14, D. Acebron 11, Bodo 6, Delos Santos 3, Manuklat 2, Asis 2   (BANATNEWS)