Apartelle Suites nag-una sa BNB caging

CEBU, Philippines - Temporaryo karong nagsolo sa liderato ang Apartelle Suites human nila gipilde ang Tuesday Club, 80-75 sa 1st Benjamin Neri Borromeo (BNB) Memorial Basketball League sa miaging adlaw diha sa IBC gym sa Banawa, ning siyudad.

Ang Apartelle Suites nagbitbit karon og 5-1 nga baraha gisundan sa ilang igsuong koponan Cebu Grand Hotel (3-1), nga nahimutang sa ikaduha dihang midaog pinaagi sa forfeiture batok sa Eigado Real Estate.

Karong gabii, ang Cebu Grand Hotel makigsangka   batok sa San Remigio Beach Club diha sa Sacred Heart Center ug sa sunod adlaw, ang Apartelle Suites nagtinguha sa ilang ikaunom nga daog dihang ilang atubangon ang Eigado Real Estate.

Unom ka teams ang misalmot sa maong torneyo ug kini mao ang    Apartelle, Cebu Grand Hotel, San Remigio Beach Club, Eigado Real Estate ni Daan Bantayan Mayor Shun Shimura, Capitol Basketball Association (CAPBAS) ug Tuesday Club.

Ang mga duwa pagahimuon sa tulo ka binyu -- — IBC gym sa Banawa, Capitol Parish gym ug Sacred Heart Center sa dalan D. Jakosalem.

Ang top four teams   mo-abante sa semifinals diin ang no. 1 ug 2 teams makakuha’g twice-to-beat advantage.

Si tournament director Ian Borromeo nagkanayon nga gimugna ang maong torneyo agi'g paghandum sa ilang apohan nga si Benjamin Neri Borromeo, ang presidente sa Cebu Capitol Commmercial Complex, kinsa mipanaw niadtong Abril sa miaging tuig.

Ang pamilyang Borromeo maoy nanag-iya sa Cebu Grand Hotel ug sa The Apartelle Suites nga nahimutang sa dalan Escario, ning dakbayan atbang gyud sa Capitol Parish Church.   (BANATNEWS)