USPF, Dindo Salon milangkat sa korona sa Jiboren's Cup
CEBU, Philippines - Gipukan sa batan-ong University of Southern Philippines Foundation (USPF) volleybelles ang beteranong Team Froilan sa kulbahinam nilang lima ka hugnang lahugay aron langkaton ang korona sa women's championship sa 1st Sinulog Jiboren's Cup Volleyball Open niadtong Domingo diha sa Pasil Sports Complex.
Lahi ang senaryo sa men's division dihang ang Dindo Salon Xclusivz mipukan sa University of San Carlos (USC) sa sunod-sunod nga hugna aron dag-on ang titulo.
Ang USPF ni coach Jordan Paca midaog sa first set, 25-22. Ang madasigon nga USPF belles nga gipangulohan ni reigning Nestea Beach Volley national champions Ericka Camille Verano ug Apple Eve Saraum agresibo kaayo sa ikaduhang hugna ug miposte kini og 5-0 sa pagsugod aron pagposte og 25-22 nga kadaugan alang sa ilang 2-0 nga abante.
Apan ang Froilan nakabawi sa ikatulong set pinaagi sa pag-iskor og 25-18. Nausban pa sa fourth set human nila gipilde ang USPF, 25-21 nga nakapakulba sa duwa luyo sa talagsaong kainit sa kanhi USJ-R stars Mechelle Matuguina, Juliet Mae Marikit, Genie Sabas ug Christine Bohol uban ni Ivy Abella, Florian Gutierrez ug Cebu Sports Hall of Famer Grace Antigua.
Sa deciding game, unang nakabentaha ang Froilan dihang miposte kini og 8-3, apan naapsan kini sa USPF pinaagi sa paningkamot ni Jovi Avil nga maoy nangulo sa ilang 6-0 run aron ilogon ang bentaha, 12-9.
Mihulga ang Froilan sa katapusang higayon, 12-14 kay si Navaja mi-iskor og makalisang nga atake alang sa USPF.
Sa men's division, ang Dindo Salon Xclusivz sa pagpangulo ni RP Team member Jonrey Sasing wala kaayo makasinati'g kalisod sa ilang pakigbisog alang sa titulo batok sa USC dihang ilang gidominar ang unang-duha ka sets, 25-17, 25-14 sa wala pa nila tumbaha ang USC sa third set, 25-22.
Sa duwa alang sa ikatulong dapit, ang USPF mipukan sa Team Cebu City sud sa lima ka sets, 25-21, 22-25, 25-19, 21-25, 15-13 sa women's category, samtang ang John Patrick Caylo (JPC) mimakmak sa USPF sud sa upat ka sets, 20-25, 25-23, 25-23, 25-24 sa men's division. (BANATNEWS)
- Latest
- Trending
