Power Forty 2-0 sab sa CGBL

CEBU, Philippines - Mipakatap ug 24 puntos si Gideon Bughao aron pangulohan ang laing lima ka teammates kinsa mihipos og double figures ug gilampurnas sa Power Forty Selection ang mibisitang team nga Danao Ruby Star Basketball Association (DARUSBA) sa iskor, 118-101 alang sa ilang ikaduhang daug ug nakigtabla sa Los Amigos Basketball Association (LABA) alang sa liderato sa nagpadayong Cebu Golden Basketball League kaniadtong Sabado sa gabii didto sa Inayawan Sports Complex. Sa laing duwa, mikulit sa una nilang daog sulod sa tulo ka duwa ang Better Run Basketball Association (BRBA) nga gipangulohan ni Danny Duran pinaagi sa pag-iskor og 80-75 nga kadaogan batok sa nagsukarap nga Naga Above Forty Basketball Association (NAFBA), 80-75 ug nakigtabla sa team standings sa ilang biktima sa parehong 1-2 nga baraha.

Walay nakapiog ni Cesar Ortega sa undergoal aron maghari sa rebounds gawas pa sa iyang produksiyon nga 20 puntos ug gipaspasan sab ni Jingjing Gacayan ang iyang duwa samtang migamit sa iyang kahanas ug taas nga kasinatian si skipper Atty. Flor Yosores aron mo-iskor og 16 puntos matag usa.

 Ang beteranong point guard nga si Michael Arias ug Carding Vernaiz midugang og 14 ug 11 puntos matag usa alang sa Power Forty kinsa aduna nay 2-0 nga baraha susama sa LABA nga nag-base sa Banilad, Mandaue City.

Ang DARUSBA kinsa nahiagum og sakit kaayong kapildehan batok sa NAFBA sa ilang debut, gipangulohan ni Rowen Capoy kinsa mihipos og 32 puntos apan dili kadto igo aron salbaron ang iyang team nga naghupot na karon og 0-2 nga baraha.

Si Joel Castaneda midugang og 26 puntos alang sa DARUSBA ug si Jerry Banzon miamot og 17 puntos.

Sa laing bahin, mihakot og 24 puntos si Doods Campos aron pangulohan ang Better Run kinsa nag-agi una'g duha ka pilde sa wala pa sila maka-ipsot kagahapon batok sa NAFBA. Sila si Dodong Espinosa ug Poten Ledesma midugang og 22 ug 19 puntos matag usa alang sa Better Run.

Ang kugihan ug walay kahadlok nga si Normie Panilag maoy nangu sa NAFBA pinaagi sa iyang 27 puntos ug si Celio Repuesto may 21 puntos alang sa NAFBA kinsa miduwa nga wala ang ilang sentro nga si Tony Diaz ug shooter nga si Danilo Misa. Pito lang ka players ang mibutho alang sa NAFBA tungod kay ang ubang players padayon pang nagbakasyon.

Puntos matag usa:

First Game:

Power Forty (118)—      Bugaho 24, Ortega 22, Yosores 16, Gacayan 16, Arias 14, Vernaiz 11, Dajalos 7, Gajudo 6, Dejarme 4

DARUSBA (101)— R. Capoy 32, Castaneda 24, Banzon 17, Manulat 8, Batac 6, Capoy 4, Murillo 4, Cabahug 2, Almacin 2

Second Game:

Better Run (80)—         Campos 24, Espinosa 22 Ledesma 19, Abadejos 7, Albano 4, Arias 2, Mosqueda 2

NAFBA (75)—               Panilag 27, Repuesto 21, Niruel 8, Baltazar 6, Gentapa Flores 6, 5, Bartolabac 2. - Gabby G. Malagar (BANAT NEWS)