CEBU, Philippines - Gibuksan pagbalik ang Academy of Eskrima diin upat ka eskrimadors ang mipasar niadtong miaging buwan.
Si Academy of Eskrima president ug Supreme Grandmaster Dionisio Cañete mipahibalo nga bugtong ang mga world Eskrima Kali Arnis champion nga sila si Ermar Alexander, Diana Fauner, Cesario Perez, Jr. ug Onairos 'King' Cortel ang mipasar
Tungod niini, si Cañete nangita karon og dugang mga eskrimador nga adunay potensiyal aron motabang pagpalambo sa Filipino martial arts.
Sila si Alexander ug Fauner pulos mga langyaw nga adunay dugong Pinoy nga tua karon nagbase sa Europe ug mao karon ang nagpaila sa arnis didto sa gawas sa nasud.
Si Alexander mao sab ang nagpadagan sa upat ka eskrima schools didto sa United Kingdom, samtang si Perez ug Cortel pulos anaa sa Doce Pares World Headquarters.
Ang ikaduhang hugna sa Academy of Eskrima Batch 2 nga gilusad niadtong miaging Enero 4, padayon pa gihapong nanawat og mga estudyante sa ilang Basic ug Intermediate courses.
Gidugang usab ni Cañete nga ang mga kursong ilang gitudlo gisuportahan sa Technical Education and Skills Development Authority (TESDA).
Mangulo usab sa mga instructors mao ang anak ni Cañete nga si Master Gerald Cañete, kinsa migradwar sa Academy of Eskrima Batch 1. – BANAT NEWS