Losiaboi, Carter nidominar sa Mano Amon Run

CEBU, Philippines - Mipakita na sab sa iyang kapaspas ang Kenyan Missionary Simon Losiaboi ug ang Sugbuanang si Madelyn Carter aron dominahon ang tagsa-tagsa nila ka dibisyon sa 29th Halad Kang Mano Amon Run niadtong Disyembre 24 didto sa Danao City Hall grounds.

Ang 27-anyos nga si Losiaboi, nga wala pay pilde sa tanang lumba nga iyang giapilan dinhi sa Sugbu maoy naghari sa 10K men’s division.

Gisundan siya ni Mendel Lopez, kinsa mi-okupar sa ikaduhang dapit, sa taga-Mindanao nga si Elmer Bartolo alang sa ikatulo.

Sa pikas bahin, ang reyna sa “Run for Sight” series nga si Carter mao sab ang nanghawod sa 10K women’s division, gisundan nilang Leizl Lumindas-Getaruelas ug Mary Joy Tabal alang sa ikaduha ug ikatulo nga dapit.

Gawas sa souvenir t-shirt, ang kampiyon sa open division mibulsa og P3,000.

Ang garbo sa Danao nga si John Phillip Dueñas mao ang midaog sa Danao City Residents 10K Open uban sa runner-ups nga sila si Leo Abello ug Enrique Mangas, samtang si Brandon Bo, Raul Durias ug Boying Singson mao ang top three finishers sa Executive Division.

Ang maong lumba magsilbe sab nga tune-up run sa mga runners, kinsa mosalmot sa 21K ug 42K Cebu City Marathon nga gitakda sa Enero 10 sunod tuig.

Ang lumba nga gipasiugdahan sa kagamhanan sa siyudad sa Danao ug Danao Sports Commission sa liderato ni Oscar 'Boying' Rodriguez Jr., gipahinungod sa giilang amahan sa siyudad nga si Ramon 'Mano Amon' Durano Sr.   (BANATNEWS)