CEBU, Philippines - Mirampa ang mga pambato sa Brgy. Mambaling sa Dancesport Barangay Competition Circuit Season 2 diha sa Brgy. Basak San Nicolas, ning siyudad.
Ang Mambaling mituhog og tulo ka titulo sa standard category dihang migawas nga kampiyon ang tandem nila ni Robby Masocol ug Namue Santillan, gisundan nila ni Giovanni ug Wendlyn Jane Estenor alang sa ikaduhang dapit ug Jon Maurice Bahena ug Niza Zanoria sa ikatulo.
Gisakmit usab sa Mambaling ang ikaduha ug ikatulong dapit sa youth latin category, samtang ang tandem nila ni Jan Paolo ug Angie Daet mao ang migawas nga kampiyon.
Mitungtong sa unang dapit sa junior standard category mao sila si Francis Hanzel Lascuna ug Jasmine Vilar sa Guadalupe, gisundan nila ni Jubert Lu Suico ug Rommelyn Manto sa Mambaling ug sa tandem nilang Mark Jason Yu ug Jan Allysa Ramil alang sa ikaduha ug ikatulo nga dapit.
Ang Brgy. Buhisan mao ang milabni sa titulo sa juvenile latin category ug juvenile standard category. – BANAT NEWS