Final leg sa 3-15-3 banatan karong Domingo

CEBU, Philippines - Banatan karong Domingo ang katapusang hut-ong sa 3-15-3 Triathlon diha sa Plantation Bay Resort and Spa didto sa Mactan.

Mga kategoriya nga tigian mao ang juniors (19-under), seniors (20-29), seniors (30-39), masters (40 above), mountainbike, female open ug tandem.

Atol sa press conference didto sa Plantation Bay, si Danao City Councilor Oscar 'Boying' Rodriguez Jr. nagkanayon nga dili lang ang mga top runners ang mosalmot, apan lakip na usab ang pamilyang Durano.

Si Department of Tourism (DoT) secretary Joseph Ace Durano, Cebu Fifth District Rep. Red Durano ug ang amahan nila nga si Danao Mayor Ramon 'Nito' Durano III ang gipaabot nga modagan.

Human sa triathlon, laing lumba na usab ang pasiugdahan sa lungsod sa Danao nga giulohan og "Halad Kang Mano Amon Run"   karong Disyembre 24.

Ang labing dakung lumba sa habagatang bahin gimugna agi'g paghandum sa giilang Grand Old Man of Danao nga si Ramon Durano Sr.

Ang maong lumba gipasiugdahan sa Danao City Sports Commission (DCSC), Sugbu Triathlon ug Plantation Bay. – BANAT NEWS