"Bakbakan sa Sinulog"

CEBU, Philippines - Mopakita na usab og    kaisog ang ALA Boys nga sila si AJ 'Bazooka' Banal ug Milan 'Melinyo' Melindo batok sa mga bisitang boksidor sa gikatakdang "Bakbakan sa Sinulog" karong Enero 14 diha sa Pacific grand ballroom sa Waterfront Cebu City Hotel and Casino, Brgy. Lahug, ning siyudad.

Ang taga-Cagayan de Oro City nga si Melindo (19-0, 5KOs) moharong ni American/Mexican Anthony Villareal, kinsa modepensa sa iyang WBC Youth Intercontinental flyweight title.

Ang 22-anyos nga si Villareal nga adunay record nga 9-2, 4KOs, naila nga usa ka delikadong boksidor human   gipatikangkang ang kanhi way pildeng si Manuel Roman sa Mexico.

Bisan pa niini, masaligon si Melindo nga mahuboan niya og bakus si Villareal atol unya sa ilang away.

Sa iyang bahin, si Banal (20-1, 16KOs) nga naglaraw karon nga mokutlo sa iyang ikalimang sunod-sunod nga kadaugan sukad sa iyang pagbalik moharong batok sa Mehikanong si Cecilio 'Boga' Santos (24 -11, 14KOs) alang sa 10-round super flyweight fight.

Gawas nilang Melindo ug Banal, unom ka parisan sa dekalibreng amateur boxers ang mopakita usab og aksiyon sa undercard.

Mao kini ang unang proyekto sa hiniusang puwersa sa Smart Telecommunications ug ALA Promotions, uban sa ABC TV 5 nga maoy media sponsor alang sa labing una ug dakung boxing event sa 2010.

Ang kasabotan tali sa ALA   Promotions ug Smart Telecommunications pormal nga gipahibalo nilang ALA Promotions president Michael P. Aldeguer ug Smart Sports marketing head and project director for special events Patrick 'Pato' Gregorio atol sa press conference sa miaging gabii diha sa Sports Exchange Bar and Grill sa Mango Square.

Matud pa ni Gregorio nga posibleng ilang ilakip sila si Banal ug Melindo sa sa undercard sa Manny Pacquiao-Floyd Mayweather Jr. showdown. Hinuon, nag-agad kini sa resulta sa ilang away sa Enero 14.

Nagkanayon si Gregorio nga ang salapi nga ilang matigom sa maong away ilang idonar ngadto ni Z 'The Dream' Gorres, kinsa nagpabilin pa didto sa University Medical Center (UMC) dihang gi-operahan ang ulo niini human matumba atol sa iyang kadaugan batok ni Luis Melendez niadtong Nobiyembre 13 didto sa House of Blues sa Las Vegas. – BANAT NEWS