National Supercross gikatakda

CEBU, Philippines - Kapin sa 50 ka riders dinhi sa Sugbu ug sa kasilinganang probinsiya ang mopakita sa ilang katakus sa labing unang Mayor Tomas Osmeña National Supercross karong Disyembre 26-27 diha sa South Road Properties (SRP).

Ang duha ka adlaw nga kompetisyon nga gipasiugdahan sa Cebu City Government ug Cebu City Sports Commission (CCSC) gibahin sa duha ka races -- motocross ug underbone.

Ang motocross gilangkuban sa beginners, novice, intermediate, expert ug mini-class divisions, samtang ang underbone adunay upat ka mga kategoriya.

Mao kini ang labing unang higayon nga ang Cebu City mopahigayon sa ilang kaugalingong motocross series.

Si CCSC executive director Gene Faelnar nagkanayon nga ang kagamhanan sa dakbayan sa Sugbu migahin og P200,000 nga ganting salapi alang sa mga mananaog.

Matud ni Faelnar nga ilang gidapit ang banggiitang riders sama nila ni Glenn Aguilar, Jovie Saulog ug Kenneth San Andres.   (BANATNEWS)