Getaruelas reyna sa 4th Seminary Fund Run

CEBU, Philippines - Human sa malampuson niyang pagtaak sa Mt.Kinabalu didto sa Indonesia, mibalik karon sa eksena sa local marathon dinhi sa Sugbu si Liezl Lumindast-Getaruelas human siya manghawud sa 4th Seminary Fund Run kagahapon didto sa Sumilon Road sa Cebu, Business Park.

Ang Mt. Kinabalu Climbathon sixth placer nga si Getaruelas mitapos sa lumba sa oras nga 41:24.71 alang sa kampiyonato sa 10K women’s division, gisundan siya nila ni Gerlyn Rose Baylon sa oras nga 47:17.00 ug Joeyry Lee sa oras nga 54:11.63 nga maoy mipuwesto sa ikaduha ug ikatulong dapit.

Mipakita usab sa ilang katakus ang mga kaparian sa pagpangulo ni Our Lady of Fatima Parish Priest Rev. Fr. Joy Danao, gisundan nila ni Rev. Fr. Joseph Lareda ug Rev. Fr. Eugene Narciso.

Sa 5K seminarian category, si Bryan Flandez mao ang mikampiyon uban nila ni Renato Destacamento ug Arthur Manalo sa ikaduha ug ikatulong dapit.

Sa iyang bahin, si Jess Gonzaga maoy nangulo sa 10K mens division, gisundan nila ni Jobert Carolino ug Bonifacio Monhas isip runner-ups.

Si Bernie Fuentes maoy midaog sa 5k student category, gisundan nila ni Rico Roquite ug Timoteo Margaha isip second ug third placer. Ang 5K Mepz-Women gidominaran ni Ma. Milagros Tanudtanud uban sa iyang mga runner-ups nga sila si Emily Rosas ug Gladys Sumile.

Samtang si Robert Daang maoy hari sa 5K Mepz-Men, samtang ang usa ka Sunday runner maoy mihipos sa ikaduhang luna ug si Rogelio Estopa mao ang third placer.

Ang maong lumba gipasiugdahan sa Archdiocesan Major Seminary Foundation Inc. (CAMSFI) uban sa suporta sa Sports and Fitness Enthusiasts (SAFE) ug Seiko Timer.  - Lemuel P. Maglinte (BANAT NEWS)