4th Seminary Fund Run mosikad na karon adlawa

CEBU, Philippines - Mosikad na ang gipaabot nga 4th Seminary Fund Run   karong adlawa diha sa Sumilon Road sa Cebu Business Park.

Kapin sa 2,000 runners ang gipaabot nga modagan ning maong lumba sa tulo ka kategoriya - 3K Open, 5K (Open), 5K (priest/seminarians) ug 10K Open.

Lakip sa modagan mao ang mga dekalibreng runners nga naglakip nila ni Revodem Aranas, managsuong Joel ug Eugene Delposo, Aiza Suwaybaguio, Girlie Baylon ug Liezl Getaruelas.

Si race director Joel Baring nagkanayon nga mosalmot usab ang mga tinun-an gikan sa mga nagkadaiyang tunghaan dinhi sa Sugbu, samtang 400 ka mga trainees gikan sa Regional Training School sa PNP ang moapil sab sa lumba. 

Tumong sa Fund Run mao nga makatigom og salapi nga itabang ngadto sa mga estudyante alang sa pagpalambo sa computer system sa seminaryo.

Ang maong lumba nga gipasiugdahan sa Archdiocesan Major Seminary Foundation Inc. (CAMSFI) gihalad alang sa ika-75 nga anibersariyo sa Archdiocese sa Sugbu.

Gisuportahan sab kini sa Sports and Fitness Enthusiasts (SAFE) ug Seiko Timer nga maoy official timer sa lumba.   (BANATNEWS)