1st Eco Fun Run mosikad na

CEBU, Philippines - Ang giilang "King of the Road" sa Sugbu nga si Mendel Lopez laraw nga makabawos ngadto ni Kenyan runner Simon Losiabi dihang magginukdanay na sab kini sa 10K division sa 1st Eco-Tourism Fun Run nga mosikad karong alas-5 sa buntag diha sa IT Park sa Lahug.

Si Lopez napukan ni Losiabi sa duha ka lumba -- Rock and Run 2 ug Lakandula Lions Club Run sa milabay'ng duha ka Domingo.

Gawas ni Losiabi, laing babag sa dalan ni Lopez mao ang sakop sa Philippine Army nga si Elmer Bartolo ug ang managsuong Joel ug Eugene Delposo.

Samtang sa 10K women’s division, magtakus ang mga dekalibreng runners nga sila si Madelyn Carter, Mt. Kinabalu climbathon sixth placer Liezl Lumindas-Getaruelas ug ang Zamboangaeña ug Queen of Cebu marathon nga si Mary Grace de los Santos.

Uban sa mga top runners nga maglumba sayo ning sayo sa buntag mao ang dul-an sa 2,000 runners nga modagan sa nagkalain-laing kategoriya -- 3K Open, 5K Open ug 5K Media category.

Ang kampiyon sa 10K category makaangkon og P7,000, sa 5K division mobulsa og P3,000 ug sa 3K makadawat og P1,000.

Ang non-winners may kahigayonan gihapon nga modaog tungod kay adunay bolahon nga tulo ka round-trip tickets sa Bangkok-Thailand kortesiya sa Philippine Airlines, Seoul-South Korea sa Cebu Pacific ug Hong Kong sa Cathay Pacific.

Ang kuwarta nga matigom sa lumba itagana alang sa mga environmental projects sa Cebu Travel and Tours (CTTA) ug Cebu Association of Tour Operators (CATO).    (BANATNEWS)