Gorres nakadawat na'g hinabang

CEBU, Philippines - Mipakita og maayong kalamboan si Z 'The Dream' Gorres, 11 ka adlaw human sa brain surgery didto sa University Medical Center sa Las Vegas.

Si ALA Promotions president Michael Aldeguer nagkanayon nga ang Sugbuanong si Gorres mahimo nang makalingkod sa iyang kama   human siya operahi   sa walang bahin sa iyang utok aron kuhaon ang nibagtok nga dugo.

Dugang ni Aldeguer nga mabuka na ni Gorres ang iyang mata, apan dili pa kini makaila. Naigo usab sa sakit nga pneumonia si Gorres maong dili pa siya mamahimong kuhaan sa iyang ventilator.

Gumikan niini, si Gorres dili na makabalik pa sa pamuksing human niya hatagi og dungog ang nasud nga Pilipinhon pinaagi sa   unanimous decision nga kadaugan batok ni Luis Melendez sa Colombia niadtong   Nobiyembre 13 didto sa House of Blues sa Mandalay Bay sa Las Vegas, Nevada.

Sa laing bahin, si Governor Gwendolyn Garcia mitunol na og P100,000 nga hinabang pinansyal ngadto sa pamilya ni Gorres kagahapon diha sa Cebu Provincial Capitol.

Ang asawa ni Gorres nga si Datches, mao mismo ang nidawat sa hinabang gikan ni Garcia. Misaksi sab si Social Welfare Officer Marivic Garcia ug Cebu 3rd District Rep. Pablo John Garcia, kinsa mihatag usab sa iyang kaugalingon hinabang.

Gawas sa salapi, si Gov. Garcia mipasalig usab nga tabangan niya si Datches aron makakuha og visa alang sa iyang paglarga ngadto sa Estados Unidos karong Disyembre 3.

Si Datches nagkanayon nga wala siya magdahum sa kadaku nga salapi nga gihatag kaniya sa Kapitolyo. – BANAT NEWS