Mawin's nagpabiling walay pilde

CEBU, Philippines - Nagpabiling walay pilde ang Mawin’s Kitchenette nila ni team owners Sherwin Lequit ug Mhiki Adriatico human mihaon sa   ikapito nilang sunod-sunod nga daog human nila lapwai ang Blue Marlins, 71-57 niadtong Domingo sa nagpadayong JS Contractors Cup 2009 basketball tournament diha sa Vicente Sotto Memorial Gym sa barangay Punta Princesa, ning siyudad.

Ang Mawins miposte og 24-16 sa first quarter, apan kalit kining namugnaw sa sunod nga duha ka periods hinungdan nga nailog sa Blue Marlins ang otso puntos nga labaw, 53-45 paghuman sa third quarter.

Dali hinuon kining nailog og balik sa Mawin's ang labaw pinaagi sa pagpatuman og man-to-man defense sa final period.

 Ang kanhi USC Warrior power forward nga si Bong Eleazar miburak og 27 puntos aron pangulohan ang Mawin’s, samtang si Lequit midugang og 12 puntos. Sila si Egin Taborada ug Mat Vallejo parehong mitampo og 10 puntos.

Sila si Weweng Ebarada ug Gabriel Bacaba maoy nangu sa pilderong Blue Marlins pinaagi sa paglansang og 13 puntos matag usa.

Sa laing duwa, ang Ritchie team naka-eskapo bitbit ang 62-60 nga kadaugan batok sa Scourge.

Midaog sab ang Emilmich ni team owner Emily Badon pinaagi sa default batok sa Victor Village, kinsa mitunga didto sa binyu nga aduna lamang lima ka players nga supak sa ilang ground rules.

Ang Emilmich nagtabla na karon uban sa Ritchie sa managsamang 4-3 nga baraha, samtang ang Victor Village nagtabla sab sa Scourge sa ilang 3-4 win-loss records.

 PUNTOS MATAG USA

Unang duwa:

Mawin’s (71) - Eleazar 27, S. Lequit 12, Toaborada 10, M. Vallejo 10, Lequit 5, Sanding 3, Empenado 2, A. Vallejo 2

Blue Marlins (57) - Bacaba 13, Ebrada 13, Vallejo 8, A. Yray 7, Alforque 6, Renbac 4, Dungog 2, P. Yray 2, Amat 2

Ikaduhang duwa:

Ritchie (62) - Gonzales 22, Paguntalan 13, Emecillo 10, Pagara 6, Tojoy 4, Abay 3, Canencia 2, Vladimir 2

Scourge (60) - Tobes 16, Arco 16, Badoods 9, Mascardo 4, Castro 4, Dada 4, Paracueles 3, Alison 2, Baka 2    (BANATNEWS)