Adlawan misidlak sa habagatan

CEBU, Philippines - Mipakita na usab sa iyang katakus si Jon-Jon Adlawan sa Power Sports Racing (PSR) human niya gisakmit ang sunod-sunod nga korona sa 16th leg sa 2009 MS Motosuit Motocross Series nga giulohan og “Mayor Patrick Barcenas Cup” niadtong Domingo didto sa Ramona Sports and Recreation Center sa dakbayan sa Carcar.

Atubangan sa nagbagang duot sa mga dumuduong, si Adlawan mipaturagas og padagan sa iyang motor aron sakmiton ang korona sa premier expert class. Iyang gilupig ang abilidad sa iyang teammate nga si Jubenile Abellar ug ang laing lig-ong contender nga si Irwin Uypitching, kinsa mipahiluna sa ikatulong dapit.

Wala hinuon magpaulahi si Abellar human iyang gipukan ang batan-ong si John Flores aron dominahon ang intermediate class, samtang si Weng Yapparcon maoy mi-okupar sa ikatulo.

Laing PSR rider nga si Andrew Canlas milangkat sab og korona ubos sa novice open production pinaagi sa pagpukan nilang Dongkey Sanchez ug Flores nga maoy runners-up. Si reigning “Rider of the Year” nga si Siegfred Ornopia sa Keiz BJ Racing Team mihakot og duha ka korona pinaagi sa beginners open production ug executive A categories.

Si Ornopia mipilde nilang Ryan Querol ug Sanchez aron langkaton ang korona sa beginners open production, samtang iya sab nga gipilde sila si Rey Ytac ug Jun Enriquez sa executive A division.

Wala sab hinuon magmahay si Sanchez sa iyang kapildihan sa novice production kay iya man nga gidominar ang local enduro class batok nilang Nikko Redulla ug Edelberg Rebusora.

Si Bonnie Bustillo mao sab ang naghari sa novice open enduro batok nilang Ryan Queron ug Ayen Ledesma, samtang sila si Joy Jocson ug Butch Flores mao sab ang nanghawod sa executive B ug executive C divisions.

Ang kinamaguwangang anak ni Ornopia nga si Earl Jean Brylle, mipakita sab sa iyang kahanas aron dag-on ang korona sa mini open category. Gipilde ni Brylle ang iyang igsuon nga si Ken Kerry, kinsa mipahimutang sa ikaduha ug Tomtom Largosa nga nalandig sa ikatulo.

Wala usab magpauwahi si Marianne Yappacorn, kinsa maoy midominar sa peewee class batok sa managsuong Ken Kerry ug Kerry Keizer Ornopia nga maoy miangkon sa ikaduha ug ikatulo nga dapit.     (BANATNEWS)