- Sa makausa pa, ang lungsod sa Boljoon mao na sab ang mo-host sa 2009 MS Motosuit Motocross Series diin ang 15th leg mo-ulbo karong adlawa didto sa barangay Badayan sa nahisgutang lungsod.
Dili momenos 60 ka riders ang mopakita sa ilang abilidad ning maong lumba nga giulohan og "3rd Mayor Deogenes Derama Motocross Challenge" nga gipasiugdahan ni Alexius Celis ug gipaluyohan sa kagamhanan sa probinsiya sa Sugbu ubos sa liderato ni Gov. Gwendolyn F. Garcia.
Ang kulbahinam nga aksiyon gipaluyohan sab ni Provincial Board Member Teresita Celis, municipal government of Boljoon ubos sa pangagamhanan ni Deogenes 'Wargong' Derama ug Vice Mayor Merlou Derama, PSR Racing Team ug Motofix.
Sa laing bahin, si MS Motosuit top honcho nga si Lou Ornopia miingon nga daghan nang indibidwal ug kompaniya ang nipadayag sa ilang pagsuporta sa umaabot nga 2010 Series nga naglakip sa Global Quality Motor Parts Corporation, ang affiliate sa Norkis Group of Companies pinaagi sa ilang managing head Reynaldo S. Buctuan ug Norkis Vis-Min Area manager Noel Micaros.
Misaad sab sa ilang dakung suporta sa umaabot nga MS Motosuit races ang Motormate Group of Companies pinaagi sa ilang CEO Carlos 'Bong' Macasarte ug marketing consultant Sol Damole, Roel Gestopa sa GR Cycle Parts ug Bob Son sa Dayang Motorcycle ug uban pa. (BANATNEWS)