Mga barangay nangandam sa My City Games

CEBU, Philippines - Nangandam na ang mga koponan gikan sa nagkalain-laing barangay dinhi sa Sugbu alang sa Cebu City My City Games nga buksan sa nanghinapos nga bahin ning bulana.

Ang mga kabarangayan gikan sa North ug South districts sa Cebu mopadala sa ilang kinakusgang koponan aron moduwa sa men’s basketball ug sa women’s volleyball.

Ang basketball gibahin ngadto sa duha ka dibisyon ug kini mao ang 18 to 39 years old ug 40-above categories.

Lakip sa mga barangay nga mikompirmar na sa ilang partisipasyon mao ang Hipodromo, San Jose, Binaliw, Pit-os, San. Roque, Day-as, Pahina Central, Pari-an ug Lahug.

Si Danny Villagracia, ang staff member sa Cebu City Sports Commission nga nahinabi sa Banat News nagkanayon, nga aduna pay mga koponan ang interesadong mosalmot apan wala pa kini mokompirmar.

Gipahibalo ni Villagracia nga karong adlawa na lang kutob ang ilang pagpanawat og applications gikan sa mga koponan.

Dugang pa ni Villagracia nga kinahanglan komplitohon sa matag koponan ang ilang mga rekisito sama sa medical certificate nga magpamatuod nga walay sakit ang ilang mga magduduwa.

Kinahanglan usab nga usa ka registered voter sa siyudad sa Sugbu ang mga magduduwa. Gidid-an sab nga makaduwa ang mga varsity ug commercial players.

Ang maong torneyo gipasiugdahan sa Cebu City Sports Commission uban sa suporta sa kagamhanan sa siyudad sa Sugbu ubos sa liderato ni Mayor Tomas Osmeña. – BANAT NEWS