Surban, laing tulo andam na sa Asian Mountainbike Championship

CEBU, Philippines - Tulo ka Sugbuanong bikers ug usa gikan sa Dumaguete ang mogikan ugma aron morepresentar sa Pilipinas alang sa Asian Mountainbike Championship didto sa Malacca, Malaysia.

Sila si Niño Surban, Marites Bitbit, John Mier ug si Wendel Barba, ang ig-agaw ni SEA Games gold medalist Joey Barba mao ang upat ka riders nga mosuway'g hatag og dungog sa nasud batok sa mga koponan gikan sa nagkalain-laing kanasoran sa Asya.

Ang Pinoy medalist nga si Surban nagtinguha karon nga mosakmit og laing titulo sa AMC elite division. Tinguha karon ni Surban nga malabwan ang una niyang rekord nga eight placer sa nag-unang duha ka legs sa AMC didto sa Indonesia ug Vietnam.

Niining higayona, hugot ang tinguha ni Surban nga molampos sa iyang tahas human siya makakuha og dakung suporta gikan ni Danao City councilor Oscar 'Boying' Rodriguez Jr., Danao City Sports Commission ug Toshio Nagashima nga maoy miabaga sa iyang galustohan.

Mihatag usab sa ilang suporta ang OZ Racing ug Dan’s Bikeshop.

Sa ilang bahin, sila si Bitbit ug Barba nangahas usab nga mokulit og daog sa maong torneyo, samtang si Mier mao karon ang labing batang Pinoy mountain bike rider nga mosalmot sa AMC.

Si Mier, anak ni Cebu Hall of Famer Renato Mier mapakita'g aksiyon sa junior division. Mao kini ang labing una niyang international mountainbike competition human sa Asian Junior Cycling nga gipahigayon didto sa Indonesia.

Si Mier mitapos sa maong lumba sa ika-14 nga dapit sulod sa 39 ka mga riders.              (BANATNEWS)