Dul-an na sa 500 runners nagparehistro

CEBU, Philippines - Aduna nay 438 ka runners ang nagparehistro alang sa ikaduhang edisyon sa Rock and Run nga mosikad karong Domingo diha sa Biliran Road sa Cebu Business Park, ning siyudad.

Tulo ka kategoriya ang nalatid sa maong lumba ug kini mao ang 12K, 5K ug 3K Open runs.

Si race director Joe Deresas, kinsa nahinabi sa Banat News nagkanayon nga nagkadaiyang running clubs dinhi sa Sugbu sama sa Holiday Spa Running Club, Executive Running Club, Alibyo Spa Running Club ug Kabangis Running Club ang nipadayag sa ilang partisipasyon.

Matud pa ni Deresas nga mas lingaw ug mas higpit ang kompetisyon nga masaksihan karong tuiga ilabi na sa 12K run nga salmotan sa mga tang-ang runners dinhi sa Sugbu nga naglakip nila ni Mendel Lopez, Madelyn Carter ug managsuong Joel ug Eugene Delposo sa University of Southern Philippines Foundation (USPF).

Modagan sab ang bantugang runners gikan sa Mindanao nga sila si Elmer Bartolo ug ang giilang Queen of Marathon dinhi sa Sugbu nga si Mary Grace Delos Santos.

Ganting salapi ug medalya ang nagpaabot alang sa mga mananaog. Ang kampiyon sa 12K makadawat og P7,000, ang second placer mobulsa og P5,000 ug ang third placer makaangkon og P3,000.

Sa 5K Open, ang kampiyon makadawat og P5,000, samtang ang kampiyon sa 3K mobulsa og P1,500.

Sa registration fee

nga P200, ang mga partisipante makadawat og libreng singlet ug race number.

Niadtong interesadong mosalmot, mahimong magparehistro sa Cebu Grand Hotel ug sa Alibyo Spa. Ang deadline hangtod pa sa Sabado.   (BANATNEWS)