Cotto mitapos sa iyang training camp

CEBU, Philippines - Gilaumang moabot sa Las Vegas ang WBO welterweight champion Miguel Cotto human niya gitapos ang walo ka semana niyang training camp didto sa Tampa, Florida niadtong Biyernes.

Ang 28-anyos nga si Cotto kinsa mikompleto sa katapusang hugna sa iyang preparasyon, mag-unang moabot sa Las Vegas kaysa ni Manny Pacquiao, duha ka semana sa dili pa mahitabo ang ilang sangka didto sa MGM Grand Garden Arena karong Nobiyembre 14.

Matud pa ni Joe Santiago, trainer ni Cotto, nga natagbaw siya sa resulta sa ilang subsob nga ensayo ni Cotto kinsa nag-una og upat ka semana sa iyang training ni Pacquiao.

Si Santiago mi-asoy nga wala sila'y nasugatan nga kakulian sulod sa walo ka semana nila nga training didto sa Tampa,Florida.

Sa iyang bahin, si Pacquiao kinsa padayon gihapon karon sa iyang ensayo didto sa Wild Card gym sa Los Angeles, gitakdang mogikan ngadto sa Las Vegas sa Nobiyembre 9.

Ang trainer ni Pacquiao nga si Roach mipahibalo usab nga anaa na sa 95% nga kaandam ang pambansang kamao padulong ngadto sa iyang laraw nga mamahimong seven-division world champion.

Sa iyang bahin, ang conditioning coach ni Cotto nga si Phil Landman mi-asuy usab nga dako karon ang nakita niyang kalamboan ni Cotto sa gidaghanun ug gipaspason sa kumo niini.

Matud pa ni Landman nga atol sa ilang pagpangandam batok ni Joshua Clottey, si Cotto nag-average og 45 ka kinumo matag round sa sparring, apan lahi niining higayuna tungod kay misaka na ngadto sa 65 ka mga kinumo ang gibuhian ni Cotto matag round batok sa iyang mga sparring partners.

Dugang pa ni Landman nga lahi gyud ang kadasig ug ka determinado ang gipakita ni Cotto sa iyang pagpangandam batok ni Pacquiao itandi sa mga miaging away niini. - Lemuel P. Maglinte gikan sa gmanews.tv (BANAT NEWS)