CEBU, Philippines - Atol gyud sa pag-abot sa tanang mga participating teams sa 2nd Nokia Pilipinas Youth Under 16 Invitational Basketball Championships gikan sa Nobiyembre 5-8 diha sa USC Main Campus gym, adunay ipahigayon nga team managers ug technical and referees meeting karong Miyerkules diha sa Crown Regency Hotels and Towers sa dalan Osmeña Blvd., ning dakbayan, ang official residence sa mga teams ug mga opisyales sa nahisgotang torneyo.
Human sa duha ka meeting, ipahigayon sab dayon ang fellowship dinner ugma sa gabii didto sa Stratus function room sa maong hotel.
Ang team manager’s meeting pagahimoon sa alas 4:30 sa hapon sa Miyerkules ug mosunod sab dayon ang technical ug referees meeting sa alas 6 sa hapon.
Upat ka teams ang mag-abot ning maong international basketball competition, ang labing unang international nga torneyo ning tuiga nga anhi masaksihan sa atong nataran agi'g pagpangandam alang sa FIBA-Asia unya sa hinapos nga bahin ning buwana didto sa Kuala Lumpur, Malaysia.
Ang Team Pilipinas unang makigsangka batok sa Japan sa Nobiyembre 5 diin sila maoy mosunod human sa preliminary game tali sa Chinese-Taipei batok sa Iran ug adunay pagahimoon nga pormal nga opening ceremony sa dili pa magtakos ang Philippines ug Japan.
Ang torneyo unya pa mahuman sa Domingo, Nobiyembre 8.
Ang host Team Pilipinas ubos ni coach Eric Altamirano pagalangkuban nilang Cederick Labing-isa, Dan Sara, Angelo Alonio, Kiefer Ravena, Chris Tolomia, Von Pessumal, Kevin Ferrer, Jeron Teng, Michael Pate, Raf Nayve, Rene Sta. Maria, Emmanuel Bonleon, Gabriel Reyes, Jeoff Javonillar, Paolo Romero, Prince Caparal ug Nestor Bantayan.
Pipila sa gi-atangan sa mga Sugboanon mao sila si Ravena, ang UAAP junior MVP gikan sa Ateneo ug anak ni kanhi PBA player Ferdinand “Bong” Ravena ug si Sta. Maria kinsa kanhi nagtungha sa Sacred Heart School-Jesuits dinhi sa Cebu apan taga Davao.
Ang torneyo gipaluyohan sa Nokia ug ubos sa Samahang Basketbol ng Pilipinas ug usa ka proyekto sa Rotary Club of Cebu Fuente nga gipangulohan sa ilang club president nga si Mr. Rady Abarintos.
Ang presyo sa ticket barato ra kaayo aron paghatag og higayon sa mga Sugboanon sa pagsaksi ning talagsaong international competition sa basketball ug aron sab paghatag og suporta sa mga batan-ong player sa Team Pilipinas nga mahimo unyang mga umaabot nga bitoon.
Ang tickets gibaligya sa P20 alang sa general admission ug P50 alang sa lower box. - Gabby G. Malagar (BANAT NEWS)