CEBU, Philippines - Gipukan sa Labangon cagers ni coach Jojo Lozano ug ni team manager Rudy Tabasa ang Duljo-Fatima, 99-93 aron pagsakmit sa kampiyonato sa Urban Barangay division sa Barangay Councilors League of the Philippines (BCLP) Cebu City Chapter basketball tournament diha sa Vicente Sotto Memorial Gym sa barangay Punta Princesa, ning dakbayan.
Sa sayo pa, ang Kalunasan naka-eskapo bitbit ang 99-97 nga kadaugan batok sa Pulang Batok aron sab pag-angkon sa korona sa Rural Barangay division.
Si Glen Cabaluna maoy nangulo sa Labangon pinaagi sa iyang 18 puntos, samtang si Junel Villarosa miamot og 16 puntos aron tabonan ang 29 puntos nga nahagdaw ni Steve Fornolles sa Duljo-Fatima.
Si Villarosa maoy napiling MVP sa Urban division, samtang si Noel Cañedo sa Kalunasan mao sab ang MVP sa Rural division. Si Lozano maoy nahimong best coach sa 2009 BCLP season.
Ang kampiyon sa matag dibisyon mibulsa og P15,000 matag usa, samtang ang runners-up nakadawat og P10,000 matag usa.
Si BCLP president Manuel Guanzon maoy nangunay og tunol sa mga tropeyo ug medalya uban ni vice president Ray Gabriel Salgado.
PUNTOS MATAG USA
Labangon (99) - Cabiluna 18, Villarosa 16, Cinco 13, Navaja 12, Flores 10, Pardenilla 7, Artez 6, Calas 5, Malicay 4, Cavalida 4, Gubaton 2, Garcia 2
Duljo-Fatima (93) -Fornolles 29, R. Perez 14, Cabahug 12, Resolloso 12, Generalao 11, Quimada 6, Rosal 5, Perez 2, Reyes 2 (BANATNEWS)