Nokia-RP Team andam na laing gira

CEBU, Philippines - Andam na nga makiggira ang Nokia-RP Team Under-16 nga gilangkuban sa mga   dekalibreng high school players batok sa nagkadaiyang koponan gikan sa Asya alang sa 2nd Nokia Pilipinas Youth Invitational Basketball Championship nga gikatakda karong Nobiyembre 5-8 diha sa University of San Carlos (USC)-main gym.

Masukod unya ang abilidad sa RP Team ni coach Eric Altamirano batok sa mga koponan gikan sa Iran, Japan ug Chinese-Taipei nga moduwa og single round-robin format.

Ang line-up sa RP Youth Squad gilangkuban nila ni Cedrick Labing-isa ug Kevin Ferrer sa UST, Dan Sara ug Raf Nayve sa San Beda College, Angelo Alonino sa Perpetual Help College, Paolo Romero, Kiefer Ravena ug Von Pessumal sa Ateneo, Cris Tolomia sa FEU, Jerog Teng sa Xavier School, Michael Pate ug Rene Sta. Maria sa La Salle-Greenhills, Emmanuel Bonleon sa Holy Child Academy-Davao.

Mokompleto sa line-up mao sila sa Gabriel Reyes sa La Salle-Zobel, Jeoff Javonillar sa RTU, Paolo Romero sa Ateneo, Prince Caperal sa Arellano University ug Nestor Bantayan sa Adamson University.

Ang maong kompetisyon magsilbeng tune-up games alang sa FIBA-Asia Youth Championships karong Nobiyembre 19-29 didto sa Malaysia.

“We in the Nokia RP Youth Under-16 team have trained long and hard for this tournament and this will give us a better gauge of how far we’ve gone,” matud pa ni Altamirano atol sa senemanang SCOOP-Cebu forum kagahapon diha sa Baseline Restaurant.

Ang upat ka adlaw nga torneyo gipaluyohan sa Samahang Basketbol ng Pilipinas (SBP) ug gipasiugdahan sa Rotary Club of Cebu Fuente ubos sa liderato ni Conrado ‘Rady’ Abarintos, kinsa mao usab ang Assessment Division chief sa local Bureau of Customs.

Ang Nokia tourney gidunganan sa pagpahigayon sa   zonal elimination sa Philippine Collegiate Championship League (PCCL) sa susamang petsa diha sa Cebu Coliseum.

Giklaro ni Abarintos nga dili na nila mahimong isibog pa ang eskidyol sa maong torneyo tungod kay nahan-ay na nila ang mga flights sa mga foreign teams nga mosalmot.    (BANATNEWS)