CEBU, Philippines - Makasaksi na sab og laing kulbahinam nga aksiyon ang mga molupyo sa Tabogon sa dihang ang Keiz BJ Motors mopasiugda sa labing unang Zigfred Povadora Duterte Invitational Motocross Cup karong Oktubre 31 didto sa Caduawan, Tabogon, Cebu.
Ang maong lumba magsilbeng 14th leg sa MS Motosuit Motocross Series 2009.
Si 2008 Rider of the Year Siegfred M. Ornopia sa Keiz BJ Racing Team nga maoy nangusog aron mapahigayon ang maong kalihukan nagkanayon nga ang mga bantugang riders nga si Glenn Aguilar ug iyang teammate nga si Dondon Yuson ang mosalmot sa maong kompetisyon. Gipaabot sab nga mosalmot ang mga dekalibreng riders gikan sa Manila.
Sama ni Ornopia, kinsa manalipod sa iyang korona sa Executive-A, ang iyang tulo ka anak nga sila si Earl Jean Brylle, Ken Kerry ug Kerry Keizer mopakita sab sa ilang abilidad sa tagsa-tagsa ka dibisyon.
Si Brylle manalipod sa iyang titulo sa mini class category, si Ken-Ken manalipod sab sa iyang titulo sa pewee class, samtang si Keizer mopakita'g aksiyon sa pewee 5-year below, ang bag-ong gipuno nga kategoriya.
Ang 1st Zigfred Povadora Cup nga kabahin sa tinuig nga kapistahan sa ilang mahal nga patron Mother of Perpetual Help karong Oktubre 31, gipaluyohan sa Castrol Power 1, Sunriser Motorcycles, JIGMA Construction, Mayor Erwin Agustino, Cebu Fourth District Congressman Benhur Salimbangon.
Ang usa ka adlaw nga kompetisyon gipaluyohan ni Felipe Montejo, Capt. Manuel Wagas, Noel Solon, Edmund Pingkian, Back to Back Motorcyle, RMO Parts Shoppe, F&FO Motor Parts, Cebu Reliance Motor Parts, MS Unlimited, MS Digital, Manang Lourdes Furniture, Reynante Tigue, Opo Gemelino, Aidorg Mktg., Global MFG Corp., NS Trading ug Pepito Asignar. – BANAT NEWS