CEBU, Philippines - Pabiling walay pilde ang Alaska Aces human nila gipanitan ang crowd-darling nga Barangay Ginebra Kings, 105-96, sa pagpadayon sa 2009 KFC-PBA Philippine Cup kagabii didto sa Araneta Coliseum.
Ang forward nga si Reynel Hugnatan mibundak og 20 puntos ug milangkat og otso ka rebounds aron pangulohan ang Aces nga misaka karon sa No.1 sa standing dala ang 4-0, win-loss record.
Gipakita sa Aces ni coach Tim Cone nga hugot ilang tinguha nga mubalik sa finals dihang ilang gilampurna ang Ginebra sa pagsugud palang sa duwa. Ang Aces, sa pagpangulo ni two-time MVP nga si Willie Miller mipa-uwan og puntos aron itukod ang 13 puntos nga labaw sa nahibiling kwatro minutos sa first-half.
Hinuon, mihimo og ilang rally ang Kings ni coach Jung Uichico sa pagsugud sa third period aron inaug ngadto sa kwatro puntos ang labaw sa Aces, 68-64.
Apan atol final period, nanginit pagbalik ang opensa sa Aces, samtang nagsalimuang pagpanagang ang Kings sa fast-break plays nila ni L.A Tenorio ug Miller nga maoy mibalik sa otso puntos nga labaw, 103-95, sa naghinapos nga 44.7 segundos sa duwa.
Si Jayjay Helterbrand mao ang top scorer sa iyang 23 puntos alang sa Kings nga nakahiagum sa labing una nilang kapildeha, 3-1, samtang si Ronald Tubid mipusa og 21 puntos. - Lemuel P. Maglinte (BANAT NEWS)