Agbay modala sa ngan sa nasud

CEBU, Philippines - Mopakita na sab sa iyang abilidad sa gawas sa nasud ang Sugbuanang martial artist nga si Stephanie Agbay diin usa siya sa morepresentar sa nasud sa 10th World Wushu Championships nga gikatakda karong Oktubre 25-29 didto sa Ricoh Coliseum sa Toronto, Canada.

Si Agbay ug kaubanan sa nasudnong koponan migikan sa nasud sayo sa buntag kagahapon.

Mao kini ang ikaduhang WWC nga naapilan sa 19-anyos nga si Agbay. Una niadtong Olympic qualifying didto sa Beijing duha na ka tuig ang nakalabay.

Sa laing bahin, ang igsuon ni Agbay nga si Mary Evangeline mouban unta sa nasudnong koponan alang sa WWC event, apan napakyas siya sa final cut.

Human sa world championships, si Stephanie Agbay gikatakdang moladlad sab sa iyang abilidad sa 25th Southeast Asian (SEA) Games didto sa Laos karong Disyembre. – BANAT NEWS