Boom Boom matumba sa round 10

CEBU, Philippines - Walay pupanagana nga mibuhi sa iyang mahait nga pulong si Indonesian champion Marangin 'Dinamita' Marbun ngadto ni Rey 'Boom Boom' Bautista ug mibahad kini nga iyang tumbahon ang garbo sa ALA Stable sa dili pa ang round 10 sa ilang sangka alang sa interim WBC International featherweight title ugma sa gabii diha sa Pacific Grand Ballroom sa Waterfront Cebu City Hotel and Casino sa Lahug, ning siyudad.

Sa pre-fight news conference nga gipahigayon kagahapon didto sa Aegean room sa Waterfront Hotel, si Marbun nagkanayon nga bilib siya sa abilidad ni Boom Boom, apan salig siya nga malangkat niya ang interim WBC International featherweight belt pinaagi sa pag-knockout sa ALA fighter.

Ang trainer ni Marbun nga si Bambang Supadi, nagkanayon masaligon sab nga molampos ang iyang batos human sa duha ka buwan nila nga training.

Giharos ni Marbun ang   katapusang walo niya ka away ug kausa lang kini natumba sa 25 niya ka mga sangka.

Hinuon, ang 22-anyos nga si Bautista nagkanayon   nga wala siya malisang sa bahad ni Marbun ug iyang segurohon nga dili na kaabot og round 10 ang ilang away. Giasoy ni Bautista nga maghuwat lang siya og hustong timing aron iyang matumba si Marbun.

Matud pa ni Bautista nga kinahanglan gyud nga modaog siya sa maong away aron mabalik ang iyang kompiyansa human sa pait niyang kapildihan batok sa Mehikanong si Heriberto Ruiz niadtong Nobiyembre 22, 2008 didto sa MGM Grand Garden Arena sa Las Vegas, Nevada.

Sa iyang bahin, si ALA Promotions big boss Michael Aldeguer namahayag nga usa ka mahinungdanon nga away ang atubangon ni Bautista tungod kay mao kini ang magsilbeng sukdanan sa iyang abilidad human sa 11 ka buwan niya nga pagpahuway sa pamuksing.

Gidugang usab ni Aldeguer nga makita usab sa maong away kun hingpit na ba nga nakabawi sa iyang kusog si Bautista human kini operahi sa iyang na-injured nga kamot. Mao usab kini ang labing unang higayon nga mo-away si Boom Boom sa mas bug-at nga timbang gikan sa 122 lbs. ngadto sa 126 lbs.

Gawas ni Bautista, laing tulo ka ALA Boys ang moladlad sa ilang abilidad batok sa tagsa-tagsa nila ka mga kaatbang.

Si Czar Amonsot makigbangga ni Jesus Muzaka sa Democratic Republic of Congo, si undefeated lightweight prospect Jason Pagara makigsangka ni Decha Bangkluaygym   sa Thailand ug si super flyweight contender Marjun Yap makigtakus sa laing Thai boxer nga si Pramuansak Posuwan. – BANAT NEWS