Pajo subha'g daog sa 6th Shakey's V-League

CEBU, Philippines - Gisugdan sa Pajo National High School ang kampanya sa pagdepensa sa ilang titulo pinaagi sa pagpulbos sa Don Gerardo Ouano Memorial National High School sud sa duha ka sets sa pagsugod sa 6th Shakey's Girls V-League Visayas Regional elimination niadtong miaging adlaw didto sa Lapu-Lapu Sports Complex.

Ang Pajo volleybelles ni coach Fr. Rolando Manayon milatos sa Don Gerardo aron maangkon ang yano nga kadaugan, 25-,10, 25-18 luyo sa mapintas nga mga atake nilang Athena Sucalit ug Catherine Marquez.

Sa ikaduhang duwa, ang St. Louis sa Mandaue City miagi pa og tulo ka sets una nila mapilde ang Southcrest.

Ang Southcrest miangkon sa unang set, 25-,21, apan ang St. Louis nakarekober sa nagsunod nga duha ka sets, 25-14, 25-19.

Ang maong torneyo mosubay og single round-robin format sa matag bracket diin ang top-two teams moabante sa crossover semifinals. Ang moguwang mga mananaog maoy magsangka sa kampiyonato.   (BANATNEWS)