Barangay Ibabao-Estancia Council-SK Cup pormal nang sugdan karong adlawa

CEBU, Philippines - Pormal na nga buksan ang 1st Barangay Ibabao Estancia Council and SK Cup Open basketball and volleyball tournament karong adlawa diha sa Barangay Community Ground (kanhi Bagsakan Center) sa dakbayan sa Mandaue.

Sa naandan, sugdan ang kalihukan pinaagi sa usa ka parada sa salmotan nga mga partisipanteng koponan nga gikatakda sa alas-2 sa hapon.

Adunay 40 ka teams ang mosalmot sa basketball event nga gibahin sa tulo ka kategoriya -- midget, seniors ug 40-above.

Human sa parada isunod dayon ang opening ceremony diin si Mayor Jonas Cortes mohatag sa iyang mahinungdanon ug undanon nga mensahe ngadto sa mga atleta atol unya sa iyang pamulong. 

Gawas nga mohatag sa iyang mensahe, si Mayor Cortes mao sab ang mohimo sa ceremonial toss ug kaubanan timaan sa pormal nga pagbukas sa kompetisyon.

Sa iyang bahin, si Ibabao-Estancia barangay captain Carmelino Del Mar Jr., kinsa mao sab ang overall chairman nagkanayon nga adunay tulo ka duwa sa basketbol nga pagahimuon matag adlaw nga sugdan sa alas-6 sa gabii. Samtang ang volleyball (women) duwaon lang sa matag adlaw'ng Sabado ug Domingo sa alas-2 sa hapon.

Ang kompetisyon nga gipasiugdahan sa Barangay Ibabao Estancia Council ug sa Sangguniang Kabataan, gipaluyohan sab sa kagamhanan sa dakbayan sa Mandaue ubos sa pangagamhanan ni Mayor Jonas Cortes.   (BANATNEWS)