LLBA milangkat Purcia Cup title

CEBU, Philippines - Gipakita sa Rollway/LLBA ang ilang kamangtas sud sa korte dihang ilang gilubong ang CARGA, 84-69 aron masakmit ang korona sa 2nd Gilbert Purcia Cup niadtong Domingo sa buntag diha sa Guadalupe Sports Complex.

Mirehistro dayon og 10-0 run ang CARGA sa sayong bahin sa first period, apan ang Rollway/LLBA sa trayanggulo nilang Ram Gomez, Cacay Versoza ug Boboy Ciriaco, mikalingaw og kitkit sa labaw hangtod nga nakatabla kini, 20-all paghuman sa maong kuwarter.

Nahimong kulbahinam ang duwa dihang ang duha ka kampo nag-iyahay og ilog sa labaw.

Napakgang ang kulbahinam nga aksiyon sa tunga-tungang bahin sa final period dihang nakontrolar na sa Rollway/LLBA ni coach Billy Nadado ug sa iyang assistant nga si Jerry Augosto ang duwa human nila mausab ang ilang game plan.

Aron maseguro nga maangkon ang korona, ang Rollway/LLBA mipatuman sa ilang hugot nga depensa uban ang makalisang nga atake nga nakaabiriya sa mga opensiba sa CARGA.

Si Gomez milansang og 20 puntos aron pangulohan ang Rollway/LLBA, gisundan ni Versoza pinaagi sa iyang 18 puntos, si Ciriaco nga maoy napiling MVP miabuno og 14 puntos.

Ang naparot nga gipangulohan sab ni Francia nga mibugha og 20 puntos. Laing duha ka players ang midiskarga og double figures alang sa CARGA. Si Limatog mi-iskor og 18, gisundan ni Jay-R Purcia nga miani og 10 puntos. Ang iyang igsuon nga si Gilbert Purcia Jr. igo lang mipupo og kuwatro puntos.

Ang Rollway/LLBA gipaluyohan sab sa Rollway Freight Forwarders ni Rolly dela Pieza, i3R Motor Parts ni Dandan Ramos ug sa John Videoke ni Ely Gomoz.

PUNTOS MATAG USA

ROLLWAY/LLBA (84) - Gomez 20, Versoza 18, Ciriaco 14, Ramos 7, Ngujo 5, Bancale 5, Giganto 4, Amodia 4, Pepito 2, Lamoste 2, Eroles 2

CARGA (69) - Francia 20, Limatog 18, J. Purcia 10, Jayme 8, Macasero 6, Oporto 4, G. Purcia 4 (BANATNEWS)