CEBU, Philippines - Naghinam-hinam na ang Lapu-Lapu Basketball Association (LLBA) cagers nga mosakmit sa korona sa 2nd Gilbert Purcia Cup dihang ilang dumbolon ang CARGA karong adlawa diha sa Guadalupe Sports Complex.
Ang LLBA/Rollway ug CARGA nakaangkon og lingkoranan sa finals human sa ilang kadaugan batok sa tagsa-tagsa nila ka kaatbang.
Ang LLBA/Rollway naka-eskapo batok sa Bajao, 74-73 niadtong Septiyembre 20, samtang ang CARGA midaog batok sa Lite Shipping niadtong miaging gabii.
Matud pa ni LLBA/Rollway coach Billy Nadado nga daku ang ilang purohan nga madaog nila ang titulo kay ila na man nga nasukod ang abilidad sa CARGA atol sa ilang 66-54 nga kadaugan sa una nilang panag-abot niadtong Agosto 9 diha sa Sacred Heart School-Jesuit (SHS-J) gym sa General Maxilom Avenue, ning siyudad.
Itugyan ni Nadado ang iyang pagsalig ngadto nilang Boboy Ciriaco, Cacay Versoza, Mario Bancale ug Pompie Ngujo. Nanginahanglan sab siya og tabang nilang Ernie Giganto, Ram Gomez, Rey Amodia, Neil Pepito, Rey Tampus ug Arman Lamoste aron purongpurongan og laing korona ang ilang koponan nga gipaluyohan sa Rollway Freight Forwarders ni Rolly dela Peza, John Videoke ni Ely Gomoz ug i3R Motor Parts ni Dandan Flores.
Samtang ang CARGA magsalig sa abilidad nilang Joseph Jayme, Michael Macasero ug sa managsuong Jay-R ug Gilbert Purcia Jr. (BANATNEWS)