Semis tumong sa USJ-R, USC

CEBU, Philippines -  Pagsakmit og luna sa semifinals mao karon ang bugtong tinguha sa University of San Jose-Recoletos (USJ-R) Jaguars ug sa University of San Carlos (USC) Warriors batok sa tagsa-tagsa nila ka kaatbang sa 9th Cebu Schools Athletic Foundation, Inc. (CESAFI) basketball event diha sa Cebu Coliseum.

Ang Jaguars, kinsa maoy third seed, makigsangka batok sa sixth seeded Cebu Institute of Technology (CIT) Wildcats, samtang ang fourth-seeded Warriors makigtigi sa Southwestern University (SWU) Cobras.

Karon dili na kinahanglanon ang standings ug ang pagdaog alang niadtong seeded teams maoy labing importante aron maka-abante sa semifinals.

Sa sangka sa juniors division, ang third seeded CIT Wildkittens makigtakus batok sa USC Baby Warriors, samtang ang fourth-ranked USJ-R Baby Jaguars makigduwa sa Sacred Heart School-Jesuit (SHS-J) Eaglets.

Sa una nilang pagtagbo, gilayog sa Jaguars ang Wildcats ug ila kining gipanitan sa iskor nga 94-64.   Nagpasabot kini nga walay ikabuga ang Wildcats ug sama sa gilauman, posibleng mahimo gihapon kini karong gabii.

Sa laing bahin, ang gipaabot sa katawhan karong adlawa mao ang engkuwentro sa USC ug SWU nga gituhoang mas kulbahinam pa tungod kay nahimong mabulokon ang una nilang pag-abot diin nidaog ang Warriors og usa lang ka punto.

Sila si Arrd Diango ug Eliud Poligrates maoy magtinabangay sa backcourt uban sa abag nilang Jefferson Pria ug Chris Litorja.

Sa habig sa Warriors, lauman niini mao sila si Giovanni Padillo, Michael Cantonao, Ryan Carlo Padayao, Gene Noel Gallarde ug Sam Hermosa.

Sa higayon nga modaog ang Jaguars ug ang Warriors, mo-abante na sila sa semifinal, apan kun silang duha mapilde, adunay ipahigayon nga playoff. (BANATNEWS)