Flores Boxing nanghawod

CEBU, Philippines - Managlahing dalan ang gisubay sa duha ka boxing stables -- Flores Boxing Club (FBC) ug Philippine-Australian Boxing Club sa Summit Natural Drinking Water Amateur Series didto sa Gaisano Country Mall sa Banilad, ning siyudad.

Sila si Mark Dignos, Jerome Pitogo ug Juan Aparece mipukan sa tagsa-tagsa nila ka mga kaatbang alang sa FBC.

Si Dignos midaog sa puntos batok ni Rason Tarona sa PBC sa 50 kgs. class, samtang si Jerome Pitogo mipukan ni Ricky Taraya sa Camotes sa ilang sangka sa 54 kgs. class ug si Aparece mikulit og 2-1 nga kadaugan batok ni Junmar Villafania.

Bugtong boksidor nga napilde sa FBC mao si Uelmark Dignos, kinsa napukan batok ni Kevin Jake Catajara sa Talamban National High School ubos sa 39 kgs. class.

Sa laing, si Jeffrey Estela miluwas sa PABC sa kauwaw human siya midaog batok ni Bryan Remedio sa Cabancalan Elementary School.

Ang teammate ni Remedio nga si Jomar Caspe mitubos sa maong kapildihan dihang iyang gibuntog si Bebe Rama sa PABC. Si Reoxyl Tabogon nangayo lang og 39 segundos aron pahunongon si Eugen Ladesa sa Tagbilaran sa 45 kgs.class.

Sa 54 kgs. class., ang taga-Cagayan de Oro nga si Joseph Ebalang mikulit sab og daog batok sa stablemate ni Ladesa nga si Frank Isidro, samtang si Rommel Casañares ug Rene Boy Delema sa Banilad Elementary School parehong   mirehistro og daog batok nila ni Kint Mike Tuñacao sa 25 kgs. class ug Miguel Semblante sa 28 kgs. class.

Si Junmar Yabut sa Kalibo, Aklan miuli usab dala ang impresibong kadaugan human niya gipahunong si Jamewell Amacanin sulod sa 47 segundos sa 47 kgs. class. (BANATNEWS)